Mu Juli na Auguste 2020, ootjikando otjitenga eṱunḓu rovakambure mouye okutarera oprograma yomaworonganeno wotukondwa momayuva yemwe. Okuyenenisa otjiṋa hi, oprograma ndji ai sokutorokwa momaraka yokombanda 500. Otjiungura hi otjini tji kambura oure wombura imwe poo kombanda yanao okumanuka. Posiya mena romutjise omuhwange mbwi ocorona, ovatoroke va ri nomieze vine okumana omatorokero womaworonganeno wotukondwa yo-2020 “Kareye nenyando aruhe”!

 Orupa romatorokero na indwi rOmarandero romberoo Ohongora yOvahongonone va Jehova twa vatera notjiungura otjinene hi. Orupa rOmatorokero rwa muna kutja ovatoroke mave hepa oviungurisiwa okuyenena okumana otjiungura hi, tjimuna ozombako zozombosiro ozombwa. Orupa rOmarandero rwa yenena okuranda ozombako 1 000 nu ave yenene okuzehinda kotuveze ape 200.

 Kutja ve pwike otjimariva, orupa rOmarandero rwa randa ozombako ozengi. Okuzambo ozombako nḓa za hindwa koruveze kaaṋi rumwe amaaze kahindwa kovatoroke. Ombako aihe pamwe nomahindiro i kosa $170, posiya mena rokutja twa randa ozombako ozengi pamwe, twa randa kopereisa yokehi yozoperesende 20.

 Orupa rOmarandero aaru sokuranda nokuhinda ozombako nḓa mu April na Mei 2020, moruveze ndo ozongetjefa ozengi kaze yenene okuungura mena romutjise woCorona. Posiya komaandero wa Mei, ozomberoo zomatorokero, otutavi tozomberoo, notuveze twa rwe tomatorokero twa ri noviungurisiwa mbya ve hepa.

 Omutarere worupa rOmarandero Jay Swinney wa tja: “Pa ri omaunguriro omawa pokati kotupa pekepeke poBetel nozongetjefa zarwe nḓa ri norupa. Ombepo ya Jehova ya yenena okutuvatera okuungurisa oviyandjewa vyouharupu momuano omuwa nokuvatera ovakambure ovakwetu tjimanga.”

 Nicholas Ahladis, ngu vatera morupa romatorokero wa tja: “Twa tunduuzwa tjinene indu tji twa muna oviungurisiwa mbi, orondu ovatoroke kave yandjerwa okuryanga. Nandarire kutja ka vari metuwo rimwe, ovatoroke va ungura pamwe nawa, okuyenena okutoroka nokurikota omahungi, ovipuratenwa, nomaimburiro momaraka wokombanda 500.”

 Ihi i tjimwe tjoviungura mbya yenenisiwa okuyenena okupitisa omaworonganeno wotukondwa nga “Kareye nenyando aruhe”! yombura ndji 2020. Oviyandjewa vyeṋu vyouharupu okupitira morungovi ndwi donate.pr418.com nomiano vyarwe vyokuyandja vi yenenisa oviungura mbi.