Tu meh taun keterubah, semua bala menyadi di serata dunya deka meda program konvensyen pelilih menua ba maya ti sama. Ngambika pelan tu mujur, semua program nya patut disalin lalu dirikut, dalam lebih ari 500 iti bansa jaku. Kesuah iya, projek besai tu engka begunaka setaun lebih endur tembu. Tang, ketegal penusah penyakit COVID-19, sida ke nyalin program konvensyen pelilih menua taun 2020 “Seruran Gaga Ati”!, patut nembuka projek nya kurang ari empat bulan.

 Translation Services enggau Global Purchasing (iya nya begian penyalin enggau begian bebelika utai ba serata dunya), di Indu Opis Saksi-Saksi Jehovah sama betulung ba projek besai tu. Translation Services nemu, mayuh ari tim penyalin begunaka mayuh agi perengka, ngambi projek tu tembu. Kelebih agi, sida begunaka mikrofon ti bekualiti. Nya alai Global Purchasing, ngaga atur ngambi meli 1,000 iti mikrofon ti deka dianjung ngagai nyauka 200 endur bukai.

 Ngambi ungkus nya ulih kurang, ari ke meli siti-siti, Global Purchasing meli mayuh mikrofon dalam sekali. Semua mikrofon nya deka dianjung ngagai siti endur dulu. Udah nya, sida nyadung nya ngagai bala penyalin di serata dunya. Ketegal kitai meli mayuh mikrofon sekali, tiap iti mikrofon ngembuan ungkus, 170 dolar U.S., tauka RM726.00 nyengkaum ungkus nganjung. Rega nya 20 peratus kurang agi ari rega kedai.

 Global Purchasing patut nembuka atur tu, entara bulan April enggau Mei 2020. Tang ketegal COVID-19, mayuh bisnes enda ulih dipejalaika baka biasa. Taja pia ba ujung bulan Mei, mayuh ari opis penyalin, pampang opis enggau endur bukai alai litaricha kitai dirikut, udah nerima perengka ke diguna sida.

 Jay Swinney ke ngemataka Global Purchasing madah, “Semua begian Betel enggau busines ke bisi ungkup ba projek tu, ulih bekerejasama enggau manah. Kami ulih ngereja pengawa tu enggau jampat, sereta ngelimat belanja ke dikena, ketegal tulung ari roh kudus Jehovah.”

 Nicholas Ahladis, ti gawa ba Translation Services madah, “Bala penyalin ke benung bekurung maya nya, amat diperansang lebuh nerima perengka tu. Taja pan sida jauh ari tim diri empu, sida ulih bekerejasama enggau manah ngambika nyalin lalu ngerikut semua cheramah, drama enggau lagu dalam lebih ari 500 bansa jaku.”

 Tu semina sebagi aja ari pemayuh pengawa ke dikereja kena ngasilka program konvensyen pelilih menua, taun 2020 ti betajuk “Seruran Gaga Ati!” ngagai semua bala menyadi di serata dunya. Pengawa tu mujur ketegal pengerah jari kita, ti meri duit pemeri nengah online ba donate.pr418.com sereta enggau chara bukai.