Ta Hulio anna Agosto 2020, maggiriddang nga magiraw na wawwaragi ta interu mundo i rehional nga kombension. Sangawe paga laman nga mesimmu yatun. Tapenu mabbalin yaw tu posible, mawag nga me-translate ta maturu tu 500 nga lengguahe i rekording ira na palappa anna karuan paga. Gagangay ngana nga kawagan i tanga-ragun onu maturu paga tapenu maplano anna mabalin i kunnaw nga proyekto. Ngem megafu ta coronavirus pandemic, mawag nga balinan na translator ira i 2020 “Magayayya Kanayun”! nga Rehional nga Kombension ta maggi appa nga vulan laman.

 Nanguffun taw nga daka-dakal nga proyekto i Translation Services anna Global Purchasing ta World Headquarters na Saksi ira ni Jehova. Nanono na Translation Services nga kawagan na aru nga translation team i equipment ira tapenu mabalidda i trabahu, lalu ngana i dekalidad ira nga microphone. Giminatang i Global Purchasing tu 1,000 nga microphone anna nipatulugda ta maggi 200 nga lokasion.

 Tapenu makamenos tu kuartu, aru nga microphone i nagatang. Nepatulug yatun ta tadday laman nga lugar nige nga nepatulug gapa ta translator ira ta interu mundo. Gafu ta aru i ginatang tam, sinaggi-$170 U.S. laman i kada microphone, nelagum ngana i pappa-deliver. Mas mappo yaw anne nu giminatang ittam tu sinaggi-tadday.

 Ginatang anna nipatulug danaw na Global Purchasing kustu Abril anna Mayo 2020. Taw ira nga vulan, limitadu laman i operasion na aru nga negosio ira gafu ta pandemic. Ngem ta katapusan na Mayo, aru ngana nga remote translation office, branch office, anna karuan paga nga lugar ta pat-translate i nakalawa ta kawagan ira nga equipment.

 “Naddurudduffun i departamento ira ta Bethel maski paga i kumpania ira ta lawan taw nga proyekto,” kunni Jay Swinney nga manangngal ta Global Purchasing. “Gafu ta uffun na espiritu ni Jehova, paspas mi nga nakua yaw anna neyusa paga ta kapianan i donasion ira tapenu maduffunan i wawwaragi ira.”

 Kinagi ni Nicholas Ahladis nga mattrabahu ta Translation Services: “Talaga napasikan i translator ira nga naka-lockdown kustu nalawada i equipment. Maski madduruma tu lugar i miembro ira na translation team, makapat-translate anna makapar-rekord lapa ira tu palappa, drama, anna kansion ta maturu tu 500 nga lengguahe.”

 Tadday laman yaw nga proyekto ta aru nga trabahu tapenu magiraw na wawwaragi ta interu mundo i 2020 “Magayayya Kanayun”! nga Rehional nga Kombension. Nagatang danaw ira nga kawagan nga gannug gafu ta donasionnu ta donate.pr418.com anna ta karuan paga.