Iti bulan ti Hulio ken Agosto 2020, iti umuna a gundaway, maymaysa a programa ti rehional a kombension ti buyaen dagiti kakabsat iti intero a lubong. Tapno maaramid dayta, masapul a maipatarus ken mairekord ti programa iti nasurok a 500 a lengguahe. Gagangay a makatawen wenno nasursurok pay ti kasapulan iti panagplano agingga a makompleto ti kasta a proyekto. Ngem gapu iti coronavirus pandemic, masapul a maipatarus ti 2020 “Kanayon nga Agragsakkayo”! a Rehional a Kombension iti nasurok laeng a tallo a bulan.

 Nagtinnulong ti Translation Services ken ti Global Purchasing iti Sangalubongan a Hedkuarter dagiti Saksi ni Jehova para iti daytoy nagdakkel a proyekto. Imbaga ti Translation Services a kasapulan ti adu a translation team ti ad-adu pay nga equipment iti panagirekord, lallalo dagiti dekalidad a mikropono, tapno maaramid daytoy a proyekto. Isu a gimmatang ti Global Purchasing iti 1,000 a mikropono ken naideliber dagita iti dandani 200 a lokasion.

 Tapno makainut iti kuarta, bulto ti pannakagatang dagiti mikropono. Naideliber dagita iti maymaysa a lugar, sa naipatulod kadagiti nagduduma a translation team iti intero a lubong. Mapan a ti presio ti tunggal mikropono agraman ti pannakaipatulodna ket agarup ₱8,500 ($170 U.S.), isu a nasurok a 20 a porsiento ti nainuttayo iti retail a presiona.

 Ginatang ken impatulod dagita ti Global Purchasing idi Abril ken Mayo 2020. Iti dayta a tiempo, limitado ti operasion ti adu a negosio gapu iti pandemic. Uray no kasta, idi dandanin agtapus ti Mayo, naawaten ti kaaduan a remote translation office, sanga nga opisina, ken ti dadduma a translation team dagiti kasapulan nga equipment.

 “Mayat ti kooperasion dagiti departamento iti Bethel ken dagiti suplayer para iti daytoy a proyekto,” kuna ni Jay Swinney, nga overseer ti Global Purchasing. “Alisto a naaramidtayo daytoy ken nakainuttayo iti pondo para iti proyekto ti organisasion gapu iti tulong ti espiritu ni Jehova.”

 Kuna ni Nicholas Ahladis, nga agtrabtrabaho iti Translation Services: “Naparegta unay dagiti agipatpatarus a naka-lockdown iti dayta a tiempo idi naawatda dagiti equipment. Uray no agduduma ti ayan dagiti miembro ti translation team, makapagtitinnulongda nga agipatarus ken agirekord kadagiti palawag, drama, ken kanta iti nasurok a 500 a lengguahe.”

 Daytoy ti maysa kadagiti adu a nalpas a proyekto tapno maaramid ti 2020 “Kanayon nga Agragsakkayo”! a Rehional a Kombension para kadagiti kakabsat iti intero a lubong. Gapu iti adu a donasionyo babaen iti donate.pr418.com ken iti dadduma pay a pamay-an, nagatang dagitoy a kasapulan nga equipment.