Kwa ĩvinda ya mbee, Mweinĩ wa 7 na wa 8, 2020, ana-a-asa nthĩ yonthe nĩmekwĩloela ũmbano mũnene ũvwʼanene ĩvindanĩ o yĩmwe. Nũndũ wa ũu, ũmbano ũsu ũnaĩ no nginya ũalyũlwe kwa ithyomo mbee wa 500. Kuma tene, kũvanga na kũtethya wĩa ũsu kũkuaa mwaka ũmwe kana mbeange. Ĩndĩ nũndũ wa ũwau wa corona, aalyũli ma Ũmbano Mũnene wa Mĩthenya Ĩtatũ wa 2020 wĩ na kyongo, ‘Tanaai Mavinda Onthe’!, manaĩ na myei ĩtheo wa ĩna ya kũmina wĩa ũsu.

 Mĩvĩa ĩlĩ yĩ Ovisinĩ Ũla Mũnene wa Ngũsĩ sya Yeova nĩyathũkũmie yĩ ngwatanĩo nĩ kana wĩa ũsu mũnene ũthele. Mĩvĩa ĩsu nĩ ũla wa Kũtetheesya Maũndũ ma Ũalyũli na Mũvĩa wa Nthĩ Yonthe wa Kũthooa Syĩndũ. Mũvĩa wa Kũtetheesya Maũndũ ma Ũalyũli nĩwamanyie kana aalyũli aingĩ nĩmendaa mĩio mingangĩ ya kũtethya wĩa, na mũno mũno maikulovoni nzeo vyũ. Nĩvo ĩndĩ, Mũvĩa wa Nthĩ Yonthe wa Kũthooa Syĩndũ wavangie kũthooa maikulovoni 1,000, na iitwawa isionĩ vakuvĩ 200.

 Nĩ kana ngalama yĩthĩwe nini, maikulovoni isu syathooiwe mbingĩ ĩvinda yĩmwe, syoombanĩwʼa vandũ vamwe, na ĩndĩ syatwaĩwa aalyũli nthĩ yonthe. Nũndũ twathooie maikulovoni mbingĩ, twatũmĩie ta ndola 170 kũthooa kĩla ĩmwe na kũmĩtwaa vala yendekaa. Mũvango ũsu watumie tũsũvĩa kũndũ mbee wa 20 ĩũlũ wa 100 kwa mbesa ila twesaa kũtũmĩa twathooaa kamwe kamwe.

 Mũvĩa wa Nthĩ yonthe wa Kũthooa Syĩndũ weekie ũu Mweinĩ wa 4 na Mweinĩ wa 5, o na kau viasala mbingĩ iyathũkũmaa ta tene nũndũ wa ũwau wa corona. O na ũu wĩ o vo, Mwei wa 5 ũithela, maikulovoni isu nĩsyavikĩtwʼe ovisinĩ mbingĩ sya ũalyũli, movisinĩ ma ũvonge, na kũndũ kũngĩ kũla syendekaa.

 Jay Swinney, ũla ũũngamĩe Mũvĩa wa Nthĩ yonthe wa Kũthooa Syĩndũ, aĩtye: “Wĩa ũsu ũendeee, nĩtũnoonie ngwatanĩo nzeo katĩ wa mĩvĩa ya Mbetheli na viasala syĩ kĩvathũkanyʼo. No veva wa Yeova ũtonya kũtuma tũtethya wĩa ũsu na mĩtũkĩ na tũtũmĩĩte mbesa nini, nĩ kana tũtetheesye ana-a-asa maitũ.”

 Nake Nicholas Ahladis, wa Mũvĩa wa Kũtetheesya Maũndũnĩ ma Ũalyũli aĩtye: “Aalyũli nĩmaneekĩiwe vinya mũno makwata syĩndũ isu nũndũ ĩvinda yĩu mainaĩ mathi vandũ. Na o na kau manatethasya wĩa mate vamwe, nĩmanathũkũmie me ngwatanĩo kũalyũla na kũlekoti maũvoo, ndulama, na mbathi kwa ithyomo mbee wa 500.”

 Wĩa ũsu nĩ ũmwe katĩ wa mawĩa maingĩ ala manatethiwʼe nĩ kana ana-a-asa nthĩ yonthe matanĩe Ũmbano Mũnene wa Mĩthenya Ĩtatũ wa 2020 wĩ na kyongo, ‘Tanaai Mavinda Onthe’! Mĩvothi yaku ya ũlau kwĩsĩla donate.pr418.com kana o nzĩa ĩngĩ nĩyo ĩnatumie tũthooa syĩndũ ĩsu.