Mu na July ne August 2020, i li chibaka che kutanga ku shingikala ku jalo, bazwalani mu shango yose ba nowo lingilila ndongoloso ye ntuthu ino fanana mu chibaka chino fanana che nako. Kuti ichecho chi khoneke, kwaka ku sheteka kuti ndongoloso i rekhodiwe mu ndimi dzi no pinda 500. Dumbu, ku nga tola gole kene ku pinda ku thama ndongoloso ye porojekiti ya ka jali ne ku i pedza. Ngono ne ntata ye chimo cha ka zhisiwa ne ku wa kwe coronavirus, bashanduli be Nshangano we Ntuthu we “Shathani Misi Yose”! we 2020, ba kabe ba na mingwedzi i pasi kwe i li 4 ku pedza nshingo.

 Be Translation Services ne be Global Purchasing ku Ofisi Hwulu ye Shango Yose ye Bafakazi ba Jehova ba ka batsha mu nshingo iwoyu nkulu kwazo. Be Translation Services ba ka elanjele kuti dzi team njinji dzi no shandula dza kabe dzi sheta equipment njinji ku widza nshingo, kwazokwazo dzi microphone dze mamo a pezhugwi. Be Global Purchasing ba ka thama ndongoloso ye ku tenga dzi microphone dzi li 1,000, ngono be be dzi tumilila ku ndawo dzi nga bata 200.

 Ku tapudza shingisa mari manjinji, dzi microphone dza ka tengiwa dzi li njinji, dzi be dzi tumiligwa ku ndawo i pakati, ngono ku dwapo dzi phekiwa kakale ku tumiligwa mu ndawo dzi mu shango. Ne kube dza ka tengiwa dzi li njinji, microphone nngwe ne nngwe u no shaka mari a pakati kwe P1926.75, e shanganila ne ku dzi tumila—ko tapudziwa ku shingisa mari ne ku pinda 20 percent ye mari a dzi no tengisiwa nayo.

 Be Global Purchasing ba ka tenga ne zila ya ka jalo ne ndongoloso ye ku tumila mu ngwedzi we April ne May 2020—mu chibaka che bunji gwe dzibisinesi dza ka dzi singa shinge zubuyanana ne ntata ye ku wa kwe bugwele. Ne kwa ka jalo, ku bupelo gwa May, bunji gwe remote translation offices, ofisi dze matabi, ne ndawo dzingwe dze ku shandulila dza ka dza amuchila equipment ya dzi no sheta.

 Jay Swinney, nlingilili we Global Purchasing wa kati: “Kwa ka ku na ku shingidzana kwa ka lulwama pakati kwe departments dze Bethele ne ba no ti zhisila zwithu ba kuzhe mu porojekiti yose iyeyi.” “I meya ya ka yengemala ya Jehova koga i nga thama kuti ti be ne ku hwanana mu ku shingidzana kwedu chinyolocho ne zila ye ku tapudza ku shingisiwa mari mu ku batsha mu zwithu zwi no sheteka zwe bundzimu.”

 Nicholas Ahladis, u no shingila ku Translation Services, a kati: “Bashanduli ba kabe ba li mu lockdown mu chibaka ichecho ba ka kulumbidzika kwazo ha be amuchila equipment iyeyo. Nenguba ba ka be ba singa khone shangana ne bangwe be team ya ba no shandulila nayo, ba ka be khona shingidzana zubuyanana ku shandulila ne ku tshambisa dzindebo, dzidrama ne njimbo mu ndimi dzi no pinda 500.”

 Porojekiti iyeyi i ingwe ye dzinjinji dza ka widziwa ku thama ndongoloso ye Nshangano we Ntuthu we “Shathani Misi Yose”! ye bazwalani mu shango yose. Zwipo zwa mu no dusa mu donate.pr418.com ne zila dzingwe zwa ka thama kuti ku khoneke kuti ku tengiwe zwithu izwezwi zwi no sheteka.