Mĩeri-inĩ ya Julaĩ na Agosti 2020, nĩrĩo rĩgũkorũo rĩrĩ riita rĩa mbere harĩ aarĩ na ariũ a Ithe witũ thĩinĩ wa thĩ yothe kwĩrorera kĩgomano kĩmwe gĩa thikũ ithatũ ihinda-inĩ rĩmwe. Nĩguo ũndũ ũcio ũhoteke, mĩario ya kĩgomano yabataraga gũtaũrũo na thiomi makĩria ma 500. Kaingĩ wĩra ta ũcio ũngĩbatara ihinda rĩa mwaka ũmwe kũbanga na kũũruta. No nĩ ũndũ wa maũndũ marĩa mooimanire na mũrimũ wa corona, ataũri maabataraga kũhaarĩria Kĩgomano gĩa Thikũ Ithatũ kĩa 2020 gĩa ‘Kenagai Hingo Ciothe’! na ihinda rĩnyihĩire mĩeri ĩna.

 Rũhonge rwa Ũtaũri na Rũhonge rwa Ũgũri rwa Thĩ Yothe thĩinĩ wa Wabici Nene ya Aira a Jehova nĩ ciateithĩrĩirie wĩra-inĩ ũcio mũnene. Rũhonge rwa Ũtaũri nĩ ruonire atĩ timu nyingĩ cia ũtaũri nĩ ciabataraga indo nyingĩ nĩguo ihote kũruta wĩra ũcio, na makĩria maikoroboni ingĩoya mũgambo wega. Rũhonge rwa Ũgũri rwa Thĩ Yothe nĩ rwabangire kũgũra maikoroboni 1,000 itwarũo hakuhĩ kũndũ 200.

 Nĩguo mbeca ihonokio, maikoroboni icio ciagũrirũo irĩ nyingĩ, igĩtwarũo handũ hamwe, igĩcoka igĩtũmĩrũo ataũri kũndũ gũtiganĩte thĩinĩ wa thĩ. Nĩ ũndũ wa kũgũra irĩ nyingĩ, o maikoroboni yarĩhĩirũo dola ta 170 cia Amerika nginya kũmĩtũma, na njĩra ĩyo tũkĩhonokia makĩria ma gĩcunjĩ kĩa 20 harĩ 100 kĩa mbeca cia kũgũra maikoroboni ĩmwe ĩmwe.

 Rũhonge rwa Ũgũri rwa Thĩ Yothe rwabatiĩ kũgũra indo icio na gũcitũma mĩeri-inĩ ya Ĩpuro na Mĩĩ 2020, ihinda rĩrĩa biacara nyingĩ itaarutaga wĩra mũno nĩ ũndũ wa mũrimũ wa corona. O na kũrĩ ũguo, mũthia-inĩ wa mweri wa Mĩĩ, indo icio nĩ ciakinyĩte wabici-inĩ nyingĩ cia ũtaũri, wabici-inĩ cia honge, na kũndũ kũngĩ kũrĩa wĩra wa ũtaũri ũrutagĩrũo.

 Jay Swinney, ũrĩa ũrũgamĩrĩire Rũhonge rwa Ũgũri rwa Thĩ Yothe, aaugire ũũ: “Honge itiganĩte cia Betheli na arĩa maatwendagĩria indo nĩ maarutithanirie wĩra wega ihinda-inĩ rĩu rĩothe. Roho wa Jehova nĩguo watũteithirie kũruta wĩra ũcio na ihenya na kũhũthĩra mĩhothi wega nĩguo tũteithie aarĩ na ariũ a Ithe witũ.”

 Nicholas Ahladis, ũrĩa ũrutaga wĩra Rũhonge-inĩ rwa Ũtaũri, aaugire ũũ: “Ataũri arĩa matangĩahotire kuuma kũrĩa maikaraga ihinda-inĩ rĩu nĩ maakenire mũno kwamũkĩra indo icio. O na gũtuĩka nĩ maaraihanĩrĩirie na ataũri arĩa angĩ, nĩ maahotire kũrutithania wĩra wega, magĩtaũra na makĩrekondi mĩario, video, na nyĩmbo na thiomi makĩria ma 500.”

 Ũyũ nĩ wĩra ũmwe warutirũo nĩguo aarĩ na ariũ a Ithe witũ thĩinĩ wa thĩ yothe makenere Kĩgomano gĩa Thikũ Ithatũ kĩa 2020 gĩa ‘Kenagai Hingo Ciothe’! Mĩhothi ĩrĩa ũrutaga na ũtaana kũgerera donate.pr418.com na njĩra ingĩ nĩyo yatũmire indo icio ihote kũgũrũo.