Mondjokonona aishe, eshi osho oshikando shotete ovamwatate novamwameme mounyuni aushe tava ka tala oshoongalele shoshitukulwa sha faafana muJuli naAuguste 2020. Opo ku ningwe ngaho, oprograma ya kwatwa omawi oya li i na okutolokwa momalaka e dulife 500. Shito, ngeno oprograma ya tya ngaho ohai kwata oule wodula okutolokwa nokukwatwa omawi. Ashike omolwonghalo oyo ya etifwa po komukifi wekomba wo-coronavirus, ovatoloki voshoongalele shoshitukulwa shomo 2020, shi na oshipalanyole “Hafeni alushe”!, ova li ashike ve na eemwedi nhee lwaapo va mane oilonga oyo.

 Oshikondo shOkutoloka nOshikondo shOkulanda keembelewa da kula dEendombwedi daJehova oya kwafela noprojeka ei inene. Oshikondo shOkutoloka osha li sha mona kutya eespana dihapu oda pumbwa oilongifo, unene tuu omambako, opo di wanife po oshilonga osho. Oshikondo shOkulanda osha li sha ninga omalongekido opo ku landwe omambako 1 000, nokwa tuminwa keenhele hanga 200.

 Opo va kwate nawa oshimaliwa, ova landa omambako momuvalu munene, taa tuminwa konhele imwe, taa tukulwa nawa nokutuminwa kovatoloki mounyuni aushe. Eshi twa landa momuvalu munene, embako keshe ola li li na eedola 2 840.70 lwaapo, mwa kwatelwa ofuto yosheendifo osho tai a eta. Osho osha li ombilixa unene, shi dulife ngeno otwa li hatu a lande koolimwe.

 Oshikondo shOkulanda osha li sha ninga omalongekido okulanda nokutuma omambako oo momukokomoko womwedi waAprili naMei; nopefimbo opo eengeshefa dihapu kada li tadi longo ngaashi shito omolwomukifi wekomba. Ndele nande ongaho, pexulilo lomwedi waMei, eembelewa dihapu dokutoloka, oitaimbelewa nosho yo eenhele dimwe dokutolokela oda li da mona oilongifo aishe oyo va li va pumbwa.

 Jay Swinney, oo ha pashukile Oshikondo shOkulanda, okwa ti: “Oikondo yaBetel oya li tai longele kumwe nawa neengeshefa. Otwa dula okulanda oinima oyo twa li twa pumbwa nokulongifa nawa omayambidido ovamwatate novamwameme omolwomhepo iyapuki yaJehova.”

 Nicholas Ahladis, oo ha longo nOshikondo shOkutoloka, okwa ti: “Ovatoloki ovo tava longo ve li mo-lockdown ova li va pamekwa neenghono eshi va mona omambako avo. Nonande ove likalela nove li kokule noilyo yeespana davo, ova dula okulongela kumwe opo va toloke, va kwate omawi oipopiwa, oinyandwa nosho yo omaimbilo momalaka e dulife 500.”

 Oprojeka ei oimwe yomeeprojeka dihapu odo da manifwa opo ovamwatate mounyuni aushe va dule okutala oprograma yoshoongalele shoshitukulwa shomo 2020, shi na oshipalanyole, “Hafeni alushe”!. Omayambidido eni ehalo liwa oo mwa yandja okupitila ko donate.pr418.com nosho yo meenghedi dimwe okwe shi ninga tashi shiiva opo ku landwe oinima oyo twa li twa pumbwa.