Chieeŋndo balɔɔ silɔ, puaapiliaa a ndepiliaa kpou ndaa nɔ ma bii bɔŋaŋ bɛndoo o paŋgii Suɛɛsɔɔ a Naandɔɔ niŋ wɔsi 2020. Teleŋ tasoo wa hoo ni le mi hei yɔŋnuŋ. Le batiuwaa hoo sɔlaa, bɔŋaŋndo hoo ndoo nɔ mbo hiviŋ o sɔɔŋ maŋgalaŋ niŋ hiouwɔɔ 500. Teleŋnda bɔɔbɔɔ, mbo chua wɔsioo a nyɛ lechoo le wali waa naa kɔɔnaa, sɔɔŋ nda nɔ le yɔŋgoo woŋ hivioo, vɛlɛ a vidueilaŋ. Kɛ mɛɛ naa Kolonaa hoo del, wanaa hiviaa ndaa nɔ ma hivi bɔŋaŋndo hoo kpou o paŋguŋ hiɔɔlu bɛŋgu.

 Mi Kunda Kɔɔna Sɔɔŋ le Wali Hiviaa Wo a Kunda Piandu Nyɔɔŋ le Kɔɔnaa o Fondaŋnda Lebolta Seiyaa Chɛhowaa Wo, mala tau le wali bɛndoo hoo tosaa. Mi Kunda Kɔɔna Sɔɔŋ le Wali Hiviaa Wo cha maa wanaa hiviaa yeema nyɛm walloŋ tau le wallo hoo. Ndaa nɔ ma pindul nda nyɛm waliŋ sɔvɛ sɔviɔŋ le diomndaŋ chuaa. Mi Kunda Piandu Nyɔɔŋ le Kɔɔnaa Wo kɛɛsiaa le bulula suaa laŋ piondɔɔ 1,000. Nduyɛ fondaŋnda nda yɔŋ laŋ ndo laa wa le 200.

 Le nyɛsɔlaa mandaa, a pindu laŋ deeve deeve le. Kɛ ma piandu laŋ tau o foofo. Okoŋ ma yɔŋ ndaŋ o lɛŋndeŋ lepilɛ niŋ le ma tiimbuu laŋ, nduyɛ ma piɔu piɔu laŋ o lɛŋii yɛ yɛi niŋ chieeŋndo balɔɔ silɔ. Le mɛɛ nda pindu laŋ deeve deeve le yɛ, baa bulu suaa opilɛ ndoo wa niŋ le dalala mapuululaŋ 170 a paawa dɛndɛ mamɛŋndo kpou. Te ndaa pendu laŋ pɛ la pilɛŋ pilɛŋ, baa wa hiouwɔɔ naa poloŋ.

 Kunda Piandu Nyɔɔŋ le Kɔɔnaa Wo ndoo nɔ mbo pendu nyɔɔŋ muŋ, nduyɛ mbo yɔŋ muŋ a Nyaakuɛiyo a Bukuloo 2020. A teleŋ koŋ, yulaa bɔɔbɔɔ ve lɛ hiŋnɔŋ maa paandu le. Kanifuule, naa Kolonaa wa niŋ. Kɛ tuupa mi Bukuloo chuu, fondaŋnda hiviaala cho landaŋ a lɛuve laŋ, lɛuwoŋ, a fondaŋnda hiviaala cheleŋ laa sɔla niŋ nyɛm wallo muŋ.

 Mi Chee Swini, wana cho chilaŋ le Kunda Piandu Nyɔɔŋ le Kɔɔnaa Wo dimi aa: “Suukaŋ kɛndɔɔ wa bɔɔ wanaa naŋ pendu nyɔɔŋ muŋ o ba wa tɛɛŋ a puaapiliaa o Bɛtɛɛl. Nyina Chɛhowaa kinɛi mala naa ni miŋ keleŋa nyɔɔŋ muŋ piondɔɔ le puaapiliaa naa malaa ŋ pisi nyɛ sɔlaa bɔɔ le.”

 Mi Nikolas Aladis, o cho wallo a Kunda Kɔɔna Sɔɔŋ le Wali Hiviaa Wo dimi aa: “Mi wanaa hiviaa wa a kindaa le Kolona wa naŋ kɔl tau mɛɛ nda sɔla nyɔɔŋ muŋ. Mi che bɛɛ ndaa nɔla ma chal wallo a chaaŋaa ndaa wanaa hiviaa maa paandu le, kɛ nyɔɔŋ muŋ mala nda ni ma tosa wali ndaa nyɛkɛndɛi. Ma nɔla le sɔɔŋ, tuulalaŋ, a chondoŋ kpou hivioo o sɔɔŋ maŋgalaŋ niŋ hiouwɔɔ 500 nduyɛ ma chua diomndaŋ.

 Le mi puaapiliaa chieeŋndo balɔɔ silɔ bii Bɔŋaŋ Bɛndoo le Wɔsi 2020 “La Wa a Kɔl Kɛndɛ Pɛŋgu o Pɛŋgu”!, walta tosaŋ ndaŋ opilɛ wa hoo ni. Toolula nya wa yɔŋgoo a kɔllo kpou o donate.pr418.com, a o nɛila cheleŋ niŋndaŋ mala ni le nyɔɔŋ muŋ piondɔɔ.