Muna ngonde a Yuli ye Agositu ya mvu wa 2020, Mbangi za Yave omu nza yawonso belanda lukutakanu lwa mvivu. Eyayi i nkumbu antete yeto awonso tulanda lukutakanu lwalu mu kolo kimosi. Ediadi muna vangama, e video za programa yayi zifwete sekolwa mu vioka 500 za ndinga. Muna vova e ludi, e salu kiaki mvu wamvimba kiadi salwa. Kansi, muna kuma kia vuku kia coronavirus, ampangi ngonde yá kaka bena zau mu sekola Lukutakanu lwa Mvivu lwa 2020, ‘Yangalalanga Ntangwa Zawonso’!

 E Buka kitalanga oma ma Sumba e Lekwa mu Nz’amvimba kuna Vula dia Sina dia Mbangi za Yave, kiasadisi mu salu kiaki kiampwena. E buka kitwadisanga e salu kia Nsekola kiabakula vo buka yayingi ya asekodi salanganu yambote bevua o mfunu, musungula microfone zambote. E Buka kia Sumba e Lekwa bavanga nkubika ya sumba 1.000 dia microfone yo twika mio mu vioka 200 za fulu.

 Muna kulula e ntalu, basumba microfone zayingi, yo sadila kompani dimosi kaka muna twika mio mu fulu yawonso. Wau vo microfone zayingi zasumbwa, konso microfone yafwa tezo kia 170 lwa dolar, kumosi ye tike. Ediadi diasadisa mu kulula e ntalu.

 E Buka kitalanga oma ma sumba e lekwa mu Nz’amvimba, bavanga nkubika yayi ya sumba yo twika microfone zazi muna ngonde ya Abidi ye Mayu ya mvu wa 2020. Muna kolo kiakina, mu kuma kia vuku e makompani ma yinkita ke masalanga diaka ko una ufwene. Kana una vo i wau, kuna mfoko a ngonde a Mayu, betele zayingi ye mavula ma nsekola ye fulu yankaka, asekodi batambula e salanganu ina bavuanga o mfunu.

 O mpangi Jay Swinney ovitanga o ntu muna Buka kia Sumba e Lekwa wavova vo: “E Departamento za Betele zasalanga entwadi ye makompani ma yinkita. Mu lusadisu lwa Yave kaka twasadila e salu kiaki mu nzaki yo toma sadila nzimbu za nkayilu muna lungisa e nsatu za nkubik’a Yave.”

 Mpangi Nicholas Ahladis, ona osadilanga muna Salu kia Nsekola wavova vo: “Asekodi ana ke bavayikanga diaka ko mu kolo kiakina mu kuma kia vuku, batoma kasakeswa vava batambula salanganu yayi. Kana una vo ke bamonananga diaka ko y’akwau asekodi muna buka yau, owau bafwana sala kumosi muna sekola video za malongi, fuka ye nkunga mu vioka 500 za ndinga.”

 E nkubika yayi, imosi muna nkubika zasadisa muna kubika Lukutakanu lwa Mvivu lwa mvu wa 2020 ‘Yangalalanga Ntangwa Zawonso’! muna wete dia wan’angudi mu nza yawonso. E nkayilu mieno nuvananga muna nzila ya donate.pr418.com ye muna nzila zankaka, twasadidi mu sumba lekwa yayi yamfunu.