Mu July amu August 2020, Bakamboni bakwe Yehova bakabungana nsengwe yoonse kweebela pulogilamu yakubungana kunene paciindi comwi. Cintu camushobo uyu tacina kucitikaawo kale. Kwaamba ayi ici cikonsheke, pulogilamu iyi yakalinga kuyandika kusansululwa mumishobo iindilila 500. Kubamba pulogilamu yamushobo uyu inga kwatola ciindi cilaamfu. Ano ceebo cabulwashi bwa Covid-19, basansulushi bakalinga kweelete kumanisha kusansulula pulogilamu Yakubungana Kunene kwakalinga kucite mutwi wakwaamba ayi “Amusangalale Lyoonse”! mumyeenshi 4.

 Dipatimenti Ilanga Pancito Yabusansulushi alimwi a Dipatimenti Ilanga Pancito Yakuula Shintu Nsengwe Yoonse yaku Maofesi esu Anene yakacafwilisha muncito iyi inene abuumbi. Bamu Dipatimenti Ilanga Pancito Yabusansulushi bakabona kwaamba ayi ma tiimu abasansulushi aanji akalinga kuyandika shisebensesho shiinji mbuli ma maikilofooni abotu kwaamba ayi bacikoonshe kubamba pulogilamu yakubungana yoonse. Aboobo Dipatimenti Ilanga Pancito Yakuula Shintu Nsengwe Yoonse yakabamba kuula ma maikilofooni ashika ku 1,000 alimwi akwaatuma mumisena ishika mpashi ku 200.

 Kwaamba ayi batasebenseshi maali aanji, bakoola ma maikilofooni aanji paciindi comwi akwaatuma kumusena womwi. Kuswawaawo, bakalinga kwaatuma ku basansulushi nsengwe yoonse. Mukwiinga bakoola ma maikilofooni aanji, maikilofooni yomwi ayomwi yakalinga kuulwa akutumwa pamuulo wamadola aku America ashika ku 170. Kucita boobo kwakabacafwa kwaamba ayi batasebenseshi maali aanji.

 Bamu Dipatimenti Ilanga Pancito Yakuula Shintu Nsengwe Yoonse bakoola shintu ishi akushituma kumusena nkoshakalinga kuyandika mu April amu May 2020. Paciindi ici beshimakwebo baanji tabakalinga kusebensa mbuli mbokalinga kusebensa lyoonse ceebo cabulwashi bwa Covid-19. Nacibi boobo, kumamanino a mweenshi wa May, ma maikilofooni aanji akatumwa ku maofesi abasansulushi, misampi alimwi akumisena imwi yabasansulushi.

 Ba Jay Swinney balanga pa Dipatimenti Ilanga Pancito Yakuula Shintu Nsengwe Yoonse bakaamba ayi: “Kwaamba ayi tuule ma maikilofooni akalinga kuyandika, madipatimenti apa Bethel bakalinga kusebensela pomwi abeshimakwebo. Mushimu wakwe Yehova wakatucafwa kusebensa cakufwambaana alimwi akusebensesha kabotu maali apekwa mukuliyandila kucafwa bamakwesu abenankashi.”

 Ba Nicholas Ahladis, basebensela mu Dipatimenti Ilanga Pancito Yabusansulushi bakaamba ayi: “Basansulushi batakalinga kuswa pamusena mpobasebensela bakasangalala abuumbi kutambula shintu ishi. Nabi kwaamba ayi tabakalinga kucanika pamusena womwi, bakacikonsha kusansulula akulekoda makani, mafilimu alimwi anyiimbo mumishobo iindilila 500.”

 Incito yakuula ma maikilofooni, nincito yomwi pancito shiinji shakasebensekwa kwaamba ayi bamakwesu bacikoonshe kubamba pulogilamu Yakubungana Kunene kwamu 2020 kwakalinga kucite mutwi wakwaamba ayi “Amusangalale Lyoonse”! Maali ngomwakapa mukuliyandila kwiinda mukusebensesha donate.pr418.com alimwi anshila shimwi ngaakasebenseshekwa kuula shintu shakalinga kuyandika.