Mu Kweji 7 ne Kweji 8, 2020, banabetu ntanda yonso basa kulonda musunsa mubajinji mpangiko imo yonka ya Kitango mu kitatyi kimo kyonka. Pa kulonga kino, byadi bilomba kwalamuna mpangiko ya mavideo makwate kala mu ndimi 500 ne kupita. Kuteakanya ne kwingila ino mingilo kuvudile kulongwa mu mwaka mutuntulu, pakwabo ne kupita. Inoko pa mwanda wa kipupo kya misongo ya bishi bya korona, balamuni ba Kitango kya Ntanda kya 2020 kinena’mba “Sangalai Mafuku Onso”! badi bafwaninwe kupwa ino mingilo mu kitatyi kekifikapo ne pa myeji iná mine.

 Mingilo ya Bwalamuni ne Mwingilo wa Kupota Bintu ya ku Kité kya Ntanda kya Batumoni ba Yehova yakweshe pa kubwanya uno mwingilo mukatampe. Mingilo ya Bwalamuni yajingulwile amba bisumpi bivule bya bwalamuni bisakilwa’ko bingidilwa pa kwingila uno mwingilo, nakampata mamikro a bukomo bukatampe. Mwingilo wa Kupota Bintu nao wekwata’ko na kupota mamikro 1000 ne kwiatuma mu bifuko kintu kya 200.

 Mwanda wa kulea lupeto, mamikro apotelwe ku bei ya mavule kya pamo, atūlwa pantu kampanda, akutwa mu bivwe mwa kwiatumina koku ne koku. Byoapotelwe kya pamo, lupeto lwa kupota mikro imo ne kwiifikija ku kifuko kyayo, lwafikile pa madolala 170 kete. Kino kyalengeje bei ikale mitūke bininge kutabuka shi mikro yapotelwe imoimo pa bunka.

 Mwingilo wa Kupota Bintu wadi wa kupota ne kutuma ano mamikro mu Kweji 4 ne Kweji 5, 2020—kitatyi kyadi kikomo kupota bintu pa mwanda wa kipupo kya misongo. Nansha nankyo, dya ku mfulo kwa Kweji 5, mabilo a bwalamuni mavule, mabetele ne bifuko bikwabo byatambwile bino bingidilwa.

 Tutu Jay Swinney, wimanine Mwingilo wa Kupota Bintu unena’mba: “Mingilo palapala ya ku Betele yaingidile pamo biyampe na bantu bapoteja, mu kitatyi kyonso kya poloje. Nansha byotulongele bukomo bukatampe mu uno mwingilo, mushipiditu wa Yehova kete o wakweshe tuvuye uno mwingilo bukidibukidi kadi pambulwa kwela lupeto luvule.”

 Nicholas Ahladis, wa ku Mingilo ya Bwalamuni nandi unena’mba: “Balamuni badi beshityile munda mu kino kitatyi bakankamikilwe bininge pa kutambula bino bingidilwa. Nansha byokebadipo befwena na bengidi nabo mu kisumpi, babwenye kwingidila pamo biyampe shē, baalamuna ne kukwata mu mawi mīsambo, madrame ne ñimbo mu ndimi 500 ne kupita.”

 Mu mingilo yaingilwe pa kuteakenya banabetu ntanda yonso Kitango kya Ntanda kya 2020 kinena’mba “Sangalai Mafuku Onso”!, mudi ne otwatela’u. Byabuntu byomutūla na mutyima tō kupityila ku donate.pr418.com ne mu miswelo mikwabo byo byakweshe kupota bino bingidilwa bikwasha.