Ña̱yóʼo kúú ña̱ yichi̱ nu̱ú, na̱ testigo Jehová na̱ íyo iníísaá nu̱ú ñuyǐví kotona ña̱ grabación ña̱ asamblea regional ña̱ ku̱i̱ya̱ 2020 ta inkáchi tiempo kotona ña̱yóʼo, tá yo̱o̱ julio xíʼin agosto kúú ña̱ kotona ña̱yóʼo. Ta ña̱ va̱ʼa kotona ña̱yóʼo, programa ña̱ asamblea xi̱niñúʼu sandáya̱ʼanaña yáʼaka 500 nu̱ú tu̱ʼun. Ta ña̱ sandiʼina keʼéna ña̱yóʼo xíniñúʼu yaʼa iin ku̱i̱ya̱ á ku̱a̱ʼáka tiempo. Soo xa̱ʼa̱ ña̱ íyo ña̱ pandemia ña̱ coronavirus, na̱ sa̱ndáya̱ʼa ña̱ asamblea regional ña̱ ku̱i̱ya̱ 2020 “Ndiʼi tiempo kusi̱í-inindó” xi̱kuumií kuitína ku̱mi̱ yo̱o̱ ña̱ va̱ʼa keʼéna chiñu yóʼo.

 Ña̱ Departamento Mundial ña̱ Compras xíʼin departamento ña̱ Servicio ña̱ Traducción ña̱ íyo chí central mundial inkáchi ka̱chíñuna tá ke̱ʼéna chiñu yóʼo. Na̱ departamento ña̱ Traducción ki̱ʼinna kuenta ña̱ ku̱a̱ʼání na̱ equipo xíniñúʼuna ku̱a̱ʼá ña̱ʼa ña̱ va̱ʼa sandáya̱ʼana ña̱yóʼo inka tu̱ʼun ta kúú, micrófonos ta na̱ Departamento Mundial ña̱ Compras sa̱tána 1,000 microfónos ta chi̱ndaʼánaña ki̱ʼva 200 lugar.

 Ña̱ va̱ʼa va̱ása ku̱a̱ʼá xu̱ʼún kuniñúʼuna ku̱a̱ʼá micrófono sa̱tána ta chi̱ndaʼánaña iin lugar ña̱ va̱ʼa ixatu̱ʼvanaña tasaá xaxanaña nu̱ú iníísaá ñuyǐví. Ña̱ sa̱tána ku̱a̱ʼání micrófono yóʼo ki̱ʼva 170 dólar ka̱na iin tá iinña. Soo, tá ní satána iin tá iinña sana yaʼvika kanaña.

 Na̱ Departamento Mundial ña̱ Compras sa̱tána ña̱yóʼo ta chi̱ndaʼánaña tá yo̱o̱ abril xíʼin mayo ña̱ ku̱i̱ya̱ 2020, ni i̱xayo̱ʼvi̱ña xíʼinna xa̱ʼa̱ ña̱ íyo ña̱ pandemia. Soo tá ndi̱ʼi yo̱o̱ mayo ndiʼi oficina remota ña̱ traducción, sucursal á inkaka nu̱ú sándáya̱ʼana tu̱ʼun xa̱a̱ xi̱kuumiína micrófono yóʼo á inkaka ña̱ʼa ña̱ va̱ʼa keʼéna chiñu yóʼo.

 Ta̱ Jay Swinney, ta̱ káchíñu ti̱xin Departamento Mundial ña̱ Compras káchira: “Ndiʼi tiempo ña̱ ke̱ʼéndi̱ chiñu yóʼo viíní ka̱chíñu na̱ departamento na̱ íyo ti̱xin Betel xíʼin na̱ íxi̱kó ña̱ʼa nu̱úndi̱. Iinlá espíritu santo Jehová kúú ña̱ kivi chindeétáʼan xíʼin na̱ hermano ña̱ va̱ʼa kuumiína ña̱ xíniñúʼuna ta kamaní koo ña̱yóʼo ta va̱ása yaʼviní kanaña”.

 Ta̱ Nicholas Ahladis, Ta̱ káchíñu ti̱xin Servicio ña̱ Traducción káchira: “Na̱ traductor na̱ va̱ása kívi kee ni̱kusi̱íní-inina tá nda̱kiʼinna micrófono xa̱á yóʼo xíʼin inkaka ña̱ʼa. Ni va̱ása níkivi ndakutáʼanna xíʼin na̱ káchíñu xíʼinna, va̱ʼava chi̱ndeétáʼanna xíʼinna ña̱ sa̱ndáya̱ʼana inka tu̱ʼun ta saátu ña̱ ke̱ʼéna grabación ña̱ discurso, video xíʼin yaa, ta yáʼaka 500 nu̱ú tu̱ʼun ke̱ʼéna ña̱yóʼo”.

 Chiñu yóʼo kúú iin ña̱ ku̱a̱ʼání ke̱ʼéna ña̱ va̱ʼa sa̱ndáya̱ʼana asamblea regional ña̱ ku̱i̱ya̱ 2020 ña̱ naní “Ndiʼi tiempo kusi̱í-inindó” ña̱ va̱ʼa koto ndiʼi na̱ hermano ña̱yóʼo. Tíxa̱ʼvindó xa̱ʼa̱ xu̱ʼún ña̱ táxindó nu̱ú donate.pr418.com a inkaka nu̱ú ta̱xindó xu̱ʼún yóʼo va̱ʼa sa̱tána ndiʼi ña̱ʼa yóʼo.