Ngenyanga kaJuly lo-August 2020 kuzakuba ngokokuqala ngqa ukuthi abafowethu labodadewethu emhlabeni wonke babukele umhlangano wesabelo ofananayo ngasikhathi sinye. Ngakho kudingakale ukuthi kuhunyutshwe futhi kurekhodwe umhlangano lo ngezindimi ezedlula 500 ukuze bawuthole ngesikhathi. Umsebenzi ongako ungathatha umnyaka kumbe ngaphezu komnyaka ukuthi uhlelwe futhi wenziwe uphele. Kodwa-ke, ngenxa yokumemetheka komkhuhlane wekhorona, abahumutshe umhlangano wesabelo ka-2020 kudingeke ukuthi benze umsebenzi lo bawuqede ngenyanga ezingaphansi kwezine kuphela.

 AboHlangothi Olusekela Umsebenzi Wokuhumutsha lababona ngokuthengwa kwezinto zomsebenzi abasemaWofisini Amakhulu aboFakazi bakaJehova basebenze ndawonye ukuze umsebenzi lo omkhulu uphumelele. AboHlangothi Olusekela Umsebenzi Wokuhumutsha bananzelela ukuthi amaqembu amanengi okuhumutsha kwakumele abe lamathuluzi okusebenzisa, ikakhulukazi amamayikhi ohlobo oluphezulu, ukuze enze umsebenzi lo. Abewofisi yezokuthenga bathenga amamayikhi angu-1 000, basebehlela ukuthi athunyezelwe ezindaweni ezingaba ngu-200.

 Ukuze kongiwe imali, amamayikhi la ahle athengwa emanengi, ahanjiswa endaweni eyodwa, asecutshwa kancane kancane kuleyondawo esethunyezelwa kubahumutshi ezindaweni ezitshiyeneyo emhlabeni wonke. Ukuthenga amamayikhi amanengi ngasikhathi sinye kwenza ukuthi intengo yawo yehle ngoba nxa kulinganiswa, ngayinye yaba yi-$170 U.S.,sokuhlanganiswa lemali yokuwathwala.

 Abohlangothi lwezokuthenga kwakumele bathenge izinto lezi njalo bazithumeze ngo-April langoMay 2020 kodwa ngalesosikhathi amabhizimusi amanengi ayengasavuli okwesikhathi eside ngenxa yomkhuhlane wekhorona. Loba kunjalo, kwathi kusiyaphela inyanga kaMay izinto ezazidingakala zasezifikile emawofisini okuhumutsha amanengi, lasemawofisini egatsha, lakwezinye izindawo okwakuhunyutshelwa kuzo.

 UJay Swinney okhangela uhlangothi lwezokuthenga uthi: “Kwakulokubambisana okukhulu phakathi kwamadiphathimenti eBhetheli kanye labezamabhizimusi. Umoya kaJehova yiwo kuphela ongenza kube lokubambisana okungaka ukuze umsebenzi onje wokuncedisa abafowethu labodadewethu wenziwe masinyane njalo kungasetshenziswa mali enengi kakhulu ”

 UNicholas Ahladis osebenza oHlangothini Olusekela Umsebenzi Wokuhumutsha uthi: “Abahumutshi ababeku-lockdown ngalesosikhathi bathaba kakhulu bethola amathuluzi la. Lanxa babengenelisi ukuba ndawonye labanye abasebenza labo, benelisa ukusebenza bonke ekuhumutsheni lasekurekhodeni izinkulumo, amadrama kanye lezingoma ngezindimi ezedlula 500.”

 Lo ngomunye wemisebenzi eminengi eyenziwayo ukuze abafowethu labodadewethu emhlabeni wonke bathole umhlangano ka-2020 olesihloko esithi “Hlala Uthokoza”! Iminikelo yenu eliyenza lisebenzisa iwebhusayithi yethu ku-donate.pr418.com kanye lezinye izindlela yiyo eyancedisa ekuthengeni lezi zinto ezazidingakala.