Momwedhi gwaJuli naAuguste 2020, osho oshikando shotango mondjokonona tatu tala oshigongi shoshitopolwa sha faathana pethimbo limwe, muuyuni awuhe. Opo shono shi vule okuningwa, iipopiwa yoshigongi oya li ya tolokwa nokukwatwa momalaka ge vulithe po 500. Shito, ohashi kutha uule womumvo gumwe nenge dhi vulithe po, opo iipopiwa nuuvidio woshigongi wu pwe okutolokwa nokukwatwa momawi. Omolwomukithi gwo-corona ngoka gwa tukuluka muuyuni, aatoloki oya li ye na okumana iilonga ayihe mbyoka muule woomwedhi ne.

 Oshikondo shIilonga yOkutoloka nosho wo Oshikondo shOkulanda koombelewa dhetu oonene muuyuni, oya li ya kwathele noonkondo, opo iilonga mbika oyindji yi pwe. Oshikondo shIilonga yOkutoloka osha li sha mono kutya oosipana odhindji dhokutoloka odha pumbwa omambako goshinanena, opo dhi vule okukwata omawi nuupu. Oshikondo shetu shokulanda osha landa omambako ge li 1 000 noga li ga tuminwa konyala kiilongo 200.

 Opo oshimaliwa shi kwatwe nawa, omambako oga landwa ogendji, e ta ga falwa kehala limwe, opo ihe oga li ga topolelwa aatoloki muuyuni auhe. Sho twa landa omambako ogendji oshita, otwa kuthilwa ko oopelesenda 20, shono sha ningitha tu lande embako kehe mwa kwatelwa oku li tuma kondando yoodola dhaNamibia 2 969.00 lwaampo.

 Oshikondo shetu shokulanda muuyuni osha li shi na okulanda nokuninga omalongekidho, opo omambako ngoka ga tumwe muApilili naMei 2020, pethimbo sho oongeshefa odhindji dha adhika tadhi nana nondatu omolwo-corona. Ihe lwopehulilo lyaMei, iikwaniipangitho mbyoka oya li ya thika nale koombelewa dhokutolokela odhindji, kiitayimbelewa nosho wo komahala galwe hoka haku tolokelwa.

 Omumwatate Jay Swinney ngoka e li omutonateli kOshikondo shetu shokulanda muuyuni okwa ti: “Pokati ketu nomahangano hoka twa landa omambako, opwa li elongelokumwe ndyoka itoo pewa komuntu. Ombepo yaJehova oyo owala ya li ya vulu oku tu kwathela tu longe iilonga mbyoka nziyanziya notu longithe nawa omayambidhidho tu kwathele aamwatate naamwameme.”

 Omumwatate Nicholas Ahladis ngoka e li mOshikondo shIilonga yOkutoloka okwa ti: “Shaashi aatoloki oya adhika nale tayi iyutha komangambeko ngoka ga tulwa po, osha li she ya tsu omukumo noonkondo sho ya mono iikwaniipangitho mbyoka. Nonando aatoloki ihaya longo ye li pamwe, oya li ya vulu okulongela kumwe sho taya toloka nokukwata iipopiwa, iinyandwa nosho wo omaimbilo momalaka ga konda po 500.”

 Iilonga yokutoloka nokukwata iipopiwa oyo yimwe yomiinima mbyoka ye shi ningitha tashi wapa, opo tu tyapuleni oshigongi shoshitopolwa shomo 2020: “Kaleni aluhe mwa nyanyukwa”! Aamwatate muuyuni auhe oya hangana pamwe mokupulakena koshigongi shoshitopolwa shoka. Omayambidhidho goye gehalo ewanawa ngoka ho tu tumine kepandja lyetu, ko-donate.pr418.com nenge ngoka ho gandja momikalo dhilwe, ogo ge shi ningi tashi wapa tu lande iikwaniipangitho mbyoka ya longithwa mokukwata oshigongi shetu shoshitopolwa.