Ipan julio niman agosto, iteixpantijkauan Jehová ipan nochi tlaltikpaktli kitaskej san no yejua grabación itech toueyitlanechikol yeyi tonajli 2020. Yejuin itlaj tlen xkeman nochiuaya. Ika yejon, yejuin grabación ononek notlajtolkuepas ipantsin 500 tlajtoltin. Para nochiuas yejuin tekitl, nonekiskia tiuejkauiskiaj kanaj se xiuitl. San ika, ipampa coronavirus, tokniuan san okipixkej naui metstin niman ijkon kitlajtolkuepaskej toueyitlanechikol yeyi tonajli 2020 “¡Nochipa xpakikan!”.

 Departamento Mundial de Compras niman departamento de Servicios de Traducción tlen onka kampa noyekanaj nochi sucursales, otlapaleuijkej ipan yejuin tekitl. Servicios de Traducción okitak ika tokniuan akin tlajtolkuepaj nonekiya kipiyaskej micrófonos niman okseki tlemach tlen kinpaleuiskia kuajli matekitikan. Departamento Mundial de Compras okinkouj 1,000 micrófonos niman okintitlan kanaj ipan 200 kalpamej.

 Tokniuan okinkoujkej melak miyek micrófonos niman ijkon maka melak patioj makinnemakiltilikan. Kuakon, cada micrófono okis ika 170 dólares. Kijtosneki ika okintemoltilijkej kanaj se 20%.

 Departamento Mundial de Compras okinkouj yejuin micrófonos ipan abril niman mayo de 2020, ijkuak akin tlanemakaj xmás tekititoyaj ipampa coronavirus. Maski ijkon, itlamiyan mayo, tokniuan akin nemij ipan kaltin kampa tlajtolkuepaj, ipan sucursales niman oksekan, ikipiayaj nochi tlen ika tekitiskiaj.

 Jay Swinney, akin kiyekana Departamento Mundial de Compras, kijtoua: “Desde ijkuak opeuj tijkouaj yejuin, melak kuajli yotitekitkej imiuan akin tikintlakouiliaj. Tikitaj ika iespíritu Jehová yotechpaleui pampa nimantsin ouel otijkoujkej nochi tlen nonekiya niman ijkon tokniuan kuajli matekitikan, niman xpatioj okis”.

 Nicholas Ahladis, akin tlapaleuiya ipan Servicios de Traducción, kijtoua: “Tokniuan akin tlajtolkuepaj oyolpakej ijkuak okinmakakej tlen ika tekitiskej. Maski tokniuan xueliyaj noitayaj pampa xueliyaj kisayaj, okitlajtolkuepkej niman okinchiujkej grabaciones de videos, tlamachtiltin niman tlakuikaltin ika ipantsin 500 tlajtoltin”.

 Melak miyek onochiuj niman ijkon nochimej tokniuan mauelikan makitakan toueyitlanechikol yeyi tonajli 2020 “¡Nochipa xpakikan!”. Nochi yejuin ouel onokouj ipampa tomin tlen onenkitemakakej ipan donate.pr418.com.