Ia Iulai mo Aokuso 2020, ko e magaaho fakamua laia ka kitekite e tau matakainaga he lalolagi katoa ke he taha e fonoaga he faahimotu he taha e magaaho. Ke maeke ke taute pihia, ne lata e tau tapakiaga he fakaholoaga ke fakaliliu ke he 500 e vagahau. Ko e matagahua pihia, ne fa mahani ke taha e tau po ke loa atu foki ke fakatokatoka mo e gahua ki ai. Ka ko e tau lauiaaga he gagao coronavirus ati fā ni e mahina ke gahua e tau matakainaga ke fakaliliu e Fonoaga he Faahimotu 2020 “Always Rejoice”!

Ko e Translation Services mo e Global Purchasing he Matapatu Ofisa he Tau Fakamoli a Iehova he Lalolagi Katoa ne lagomatai ke he matagahua lahi nei. Mailoga he Translation Services ne loga e matakau gahua fakaliliu ne lata ke moua falu koloa foki ke taute aki e gahua, mua atu ke he tau maikorofoni ne mitaki lahi. Ne fakatokatoka he Global Purchasing ke fakatau 1,000 maikorofoni ti fakafano atu ke he teitei molea e 200 he tau matakavi.

Ke fakatote hifo e totogi, ne loga e maikorofoni ne fakatau he taha e magaaho ti fakahū ke he taha e matakavi ke maeke ke fakafano atu ke he tau matakau fakaliliu he lalolagi katoa. Ha kua loga ne fakatau he taha e magaaho, ko e evalesi he taha e maikorofoni ko e $170 U.S., putoia e totogi ke fakahū atu​—kavi ke he 20 e pasene a ia ne to hifo he totogi pauaki.

Fakatau mo e fakahū atu he Global Purchasing e tau koloa nei ia Aperila mo Me 2020​—magahala ia ne fakakaupā e gahua he loga he tau pisinisi ha ko e gagao. Ka e hoko ke he matahiku ia Me, laulahi he tau ofisa fakaliliu, tau lā ofisa, mo e falu matakau fakaliliu ne moua e tau koloa nei ke fakaaoga.

“Ne mitaki e matutakiaga he tau faahi gahua he Peteli mo e tau fakafua koloa ke lata ma e matagahua nei,” he talahau e Jay Swinney ne leveki e Global Purchasing. “Ko e agaaga ni ha Iehova ati maeke ke kaufakalataha ke he gahua fakamafiti nei ke he puhala ne tau laukauka ke lalago e manako fakaagaaga he tau matakainaga.”

Ko Nicholas Ahladis, ne gahua he Translation Services ne pehe: “Ne mafanatia lahi e tau tagata fakaliliu ne lauia he lockdown ke moua e koloa nei. Pete he nonofo kehe mai mo e tau matakau fakaliliu ha lautolu, maeke agaia ni a lautolu ke fakaliliu mo e tapaki e tau lauga, tau taute tala, mo e tau lologo ke he molea 500 e vagahau.”

Taha na nei he tau matagahua ne taute ke lata mo e Fonoaga he Faahimotu 2020 “Always Rejoice”! ma e tau matakainaga he lalolagi katoa. Ko e fakamokoi ha mutolu ke tuku e tau mena fakaalofa he donate.pr418.com mo e falu puhala foki ati maeke ke fakatau e tau koloa nei.