Oko Mwisi 7 n’owo 8, 2020, oko ngendo y’erimbere, abaghala n’abali betu b’omo kihugho kyosi bakendikwama omuhindano mukulu wo kughuma n’oko mughulu mughumerera. Ekyo eritokekana, mohateghekanibwe erihamba emirenge n’esyovideo sy’emikania sy’omo binimba omo mibughe kulenga 500. Ngoko myatsi yibeghere erikolwa, hangatolere ihalaba mwaka na misi milebe eriteghekania omubírí oyo, n’erihamba omo binimba n’eribindula emikania n’esyovideo. Neryo busana n’emibere eyo tulimo ey’ekihunzo ky’ekorona, ababindula emikania y’omuhindano munene owe 2020 ‘Mutseme Mughulu Wosi’! mobatetahindania n’emisi ini omw’ibuyirira omubírí oyo.

 Esyobíro esikasondola Emibírí y’Eribindula ebitabu n’Erighula Ebindu mbiriri-mbiriri byoko Bwikalo Bukulu bw’aBimiri ba Yehova, mosyawatikirye eriteghekania omubírí munene kutsibu oyo. Ebíro y’Emibírí y’Eribindula ebitabu moyalangire ngoko ebipye bingyi ebikabindula ebitabu by’omo mibughe mbiriri-mbiriri biyitaghire ebindi bindu ebyangawatikya, ng’ehinimba hy’eribughiramo. Ebíro y’Erighula Ebindu mbiriri-mbiriri moyaghulire ehinimba hy’eribughiramo 1 000 n’eritumira hy’ebipye ebikakolera omubírí w’omo biharo hakuhi na 200.

 Eriwatikya eritendiherya franga nyingyi, ehinimba hy’eribughiramo mohyaghulirwa haghuma, hyamatumwa omo bwikalo bughuma, aho hohyangabere hikasyasengwa mo hitswe-hitswe n’eritumwa omo kihugho kyosi, eyiri ebipye mbiriri-mbiriri. Erighulira ehinimba hy’eribughiramo hyo haghuma, obuli kaghuma mokaghulirwe oko syodolare hakuhi ne 170, n’endihi y’erihituma iyineko​—eryo molyawatikirye eritendiherya esyofranga kulenga dolare 20 oko buli dolare 100.

 Ebíro y’Erighula Ebindu mbiriri-mbiriri yabya litolere iyaghula ebindu byosi ebyo n’eribilebeka oko Mwisi wa kani n’owa katano owe 2020​—omughulu owo mibírí mingyi yabya isiyikikoleka nga kera busana n’ekihunzo. Nomo byanabya bitya, oko ndulya y’oMwisi wa katano, ehinimba hyabya ihyabirihikira ebipye bingyi ebikakolera omubírí w’omo biharo ebiri hali n’esyo Beteli, ebiri omo syo Beteli, n’omo yindi myanya.

 Yo Jay Swinney oyo w’imanire Ebíro y’Erighula Ebindu mbiriri-mbiriri by’esyo Beteli syosi mwabuyire ati, “Mohabere erikola omo bughuma omo kati k’esyobiro mbiriri-mbiriri syomo Beteli n’esyo sosyete esy’ehihya esikakolera abandu b’emibírí, omw’iberererya omubírí munene oyo. Akaghala kabuyirire ka Yehova kasa ko katutokesaya erikola omubírí oyo n’omuhwa kandi luba-luba n’erikolesya ndeke esyofranga esikalua oko bihembo ebyo bandu bakaleta n’eriwatikya baghala betu n’abali betu.”

 Yo Nicholas Ahladis, oyukakola haghuma n’ebíro y’Omubírí w’Eribindula ebitabu, mwabuyire ati: “Abomo bipye eby’eribindula ebitabu ababya isibangatakolera omubírí wo haghuma busana n’ekihunzo mobatsemire kutsibu ehinimba hyabahikira. Nomo banabya isibangasangira ebiro nguma na b’omo bipye byabo omughulu w’erikola omubírí, mobatokire erikola omo bughuma omw’ibindula n’erihamba emikania y’omo hinimba, haghuma n’esyodrame, n’esyonyimbo omo mibughe kulenga 500.”

 Omubírí munene oyo ni mughuma w’oko mibírí mingyi eyakolawa busana n’eriberererya oMuhindano Munene owe 2020 “Mutseme Mughulu Wosi”! busana n’abaghala n’abali betu b’omo kihugho kyosi. Omutima w’erihitya owo mukakanganaya omw’ileta ebihembo erilabira donate.pr418.com n’omo sindi nzira byo byawatikaya erighula ebindu byosi ebyo.