A gé to wo na mésang sôônmbʉa po léfôôn, méfè tsèe ngoung ntsém pou ngia po taʼ proogram maa tchouʼté lièeʼ séta wémôʼô po na taʼ tam, tso no laa wo pouʼou wô. Légʉo ngié a to ngouo pouʼou, a zèté ngié mé kiagté maa tchouʼté wè mbing ngʉo anrégistré na méchouŋé ta ntôg 500. Mé lôôn gé kouang kouaʼ mboŋoo, mba a zèté mboo taʼ ngouʼ ta ntôg lé lôg ngʉo anrégistré métwo chouŋé paa mévidéo mbing nkiagté. Taʼ léwo yié agouô coronavirus aa pi la, méfè pié é gé kiagté maa tchouʼté lièeʼ séta yé ngouʼ 2020 «Ntʉm wui néŋé nkag kag!» zôôn té gwiée mésang ta nkouʼou lékoua lé lôg mbou ngouôgô yèe faʼ wè ntsém wô.

 Palié no na lékiagté choum po léjouou choum tsèe Létsiŋé tchouʼté Pakuié Ntang Jéova la témté lé gouôgô wèe maa faʼ. Palié no na lékiagté choum la gia ngié a zèté lé kuiʼi choum faʼ mbwo pakiagté ta ngiôon; ntchouŋo tchouŋo mémicro mié é pou mbong. Manzong wuié a lié no na léjou choum la tangté lé jou mémicro ta nkouʼou 1000 mbing ngabté na méjʉʼ ta nkouʼou 200.

 Légʉo ngié mé té tchʉngté nkab tèʼ wô, Palié no na léjouou choum la tchʉʼʉ lé jou mémicro nthié taʼ légʉa njou é yôôn; éfaʼa jʉʼ mbaké wo, ndéen ké ntchʉʼʉ foo pé wo mbii ntoumo pwo pakiagté tsèe ngouong ntsém. Léwo yié mé la thié taʼ légʉa njou mémicro é yiôôn la, a gʉo nzuing lôg njou mémicro wè ntsém po nzuing lôg ntoum tchouʼté ngouo mmo paʼ 92 585 frcs cfa. Nzuing lôgô pouʼou mbou suié na paʼ mé laa péʼé njou pa taʼ pa taʼ.

 Palié no na léjouou choum la gwiée lé jou sèe choum ntsém na Sang 3 po Sang 4 2020; a ping ngouo tam wuié méfaʼ ta ngiôôn la té ying né ngiŋé mboŋoo wô, mélaʼ gouô Corana yié a aa pi. Taʼ Sang 4 la wo mmag, mba lélhʉo Ménda lôg nkiagté méŋwaʼné, paa lélhʉo Mébétèl, ngʉo métso méjʉʼʉ lôg nkiagté mé jʉʼʉ ndièʼè é gwiée choum faʼ sié é la né nzaga wôb.

 Jay Swinney wuié a thié two mvfo na Palié no na léjouou choum gôôn ngié: «Akwo pafaʼa Bétel ngʉo tso méjʉʼʉ faʼ mé nzémé pii la kouaʼ ntémté mbou faʼ fʉʼo.» «Pég la wo kouʼou lé lwa ngouôgô yèe faʼ wè pouʼou, mbing yousé choum poŋo ntʉm na nti yé mboŋo lé lôg nkuiété méfè pégé pouʼou, nzuièʼè po zuigé ndʉalʉʉa.»

 Nicholas Ahladis wuié a faʼa lé Kwo palié no na lékiagté méŋwaʼné gôôn ngié: «Mé la kouaʼ nkuingté pakiagté pié a laa na wôb chʉo fʉʼo mé té né nzuiŋé ngié mé kuia wô, lé gwiée choum faʼ sié é la né nzaga wôb. Mboo paʼ po la té kouʼou lé tchouʼté taʼa jʉʼ faʼ lé pétso pakiagté wô, po la gwiée méchʉo lé témté nkiagté mbing ngʉo enregisté métwo chouŋé, médram paa mézôb na méchouŋé ta ntôgô 500.»

 Yôôn ŋwè aa taʼ na méfaʼ mié a la zaté lé faʼ ta ndôg nkuilé maa tchouʼté lièeʼ séta wé ngouʼ 2020 «Ntʉm wui néŋé nkag kag!» nnaa mbwo méfè tsèe ngoung ntsém. Choum poŋo ntʉm sié pi la na ntchʉaté na donate.pr418.com paa tso méchʉo ndièʼè la kuiété lé lôg njou sôôn choum sié é la né nzèté.