Kwa nthawi yoyamba, akwasu na azilogosi pacalo conse aonelele msonkhano wacigawo pa nthawi imozi m’miyezi ya July na August 2020. Kuti izi zikwanishike, penzofunika kumasulila nolekoda nkhani m’vilaŵilo vopitilila 500. Nchito iyi yenzofunika kutola caka conse olo kupitililapo kuti ikwanishike. Koma cifukwa ca mlili wa coronavirus, akwasu na azilongosi omasulila Msonkhano Wacigawo wa 2020 wa mutu wakuti “Kondwelani Nthawi Zonse”! enze tyala na miyezi 4 kuti asilizhye nchito iyi.

Akwasu a m’Dipatimenti Yomasulila na Dipatimenti ya Zogulagula ku Likulu ya Mboni za Yehova ethandiza kuti pulogilamu iyi ikwanishike. Akwasu a m’Dipatimenti Yomasulila eona kuti magulu anyinji ya omasulila enzofunika zipangizo zokwanila bwino kuti akwanilishe nchito iyi, makamaka mamaikolofoni amphamvu. A m’Dipatimenti ya Zogulagula epanga makonzedwe yogula mamaikolofoni yokwanila 1,000 noyatumizhya m’malo pafupifupi 200.

Kuti pasaonongeke ndalama zinyinji, teoda mamaikolofoni anyinji, noŵatumizhya kumalo amozi. Pavuli pake, yetumizhyiwa kuli omasulila pacalo conse. Cifukwa cakuti tegula pa mtengo wa oda, maikolofoni iliyonse, kuyangizhyilapo na mtengo wotumizhyila, yenze pa mtengo wokwanila madola 170. Izi zecitisha kuti tigule pa mtengo wochipa kupambana kugula imozi-imozi. Cifukwa ca izi, tekwanisha kusunga ndalama zopitilila pa 20 pesenti.

Akwasu m’Dipatimenti ya Zogulagula egula katungu uyu nopanga makonzedwe yotumizhya mu April na May 2020. Iyi yenze nthawi yovuta cifukwa a zamalonda anyinji enzoseŵenza lini cifukwa ca mlili wa Covid 19. Olo n’tetyo, maofesi omasulila anyinji, maofesi a msambo na m’madela ayakine, elandila katundu uyu kosilizhyila kwa mwezi wa May.

Mkwasu Jay Swinney, Woyanganila m’Dipatimenti ya Zogulagula elaŵila kuti: “Penze mgwilizano wapadela pakati pa madipatimenti a ku Beteli na a zamalonda kuti katundu uyu uyende mofulumila teti. Mzimu wa Yehova niye wetiyavya kuti tikwanishe kutumizhya katundu uyu mofulumila teti noseŵenzesha bwino zopeleka zasu na colinga coyavya akwasu na azilongosi.”

Nicholas Ahladis, wamene oseŵenzela ku Dipantimenti ya Omasulila, elaŵila kuti: “Akwasu na azilongosi amene enze mu “lockdown” pa nthawi iyi, elimbikishiwa ngako pecilandila katundu uyu. Olo kuti ayakine enze lini pa malo amozi na omasulila ayao, enzokwanisha kuseŵenzela pamozi nchito yomasulila na kulekoda nkhani, masowelo na nyimbo m’vilaŵilo vopitilila pa 500.”

Iyi ni nchito imozi pa nchito zinyinji zeseŵenzewa pokonza Msonkhano Wacigawo wa 2020 wa mutu wakuti “Kondwelani Nthawi Zonse”! kuti akwasu na azilongosi apindule pacalo conse. Zekwanishika kugula katundu uyu cifukwa ca zopeleka zanu zamupeleka kupitila pa donate.pr418.com na njila ziyakine.