Punda callarishcamanda intiru mundumanda Jehovahuaj testigoguna cai 2020 quinsa punzha asamblea grabashcara pariju ricununga. Caita rurangaj ministishca aca asamblea grabashcara 500 yali shimiunai pasachingaj. Cai tunu asamblea rurangaj shu huata o shu huata yali ministinchi. Shinajpi coronavirus ungüi tiashcamanda ¡Tucui huras cushiyaichi! 2020 quinsa punzha asambleamanda shu shimima pasachijcuna ñaca chuscu quillallara charinuca tucuchingaj.

 Intiru mundui Randina Oficina shinallara Shuj Shimiunama Pasachingaj Yanapaj Oficina Intiru Mundui Pushaj Oficinai yanapanuca cai atun tarbanara rurangaj. Shuj Shimiunama Pasachingaj Yanapaj Oficinai riparanuca ashca shujta shimii pasachijcuna mas yanapai ministishcara cai tarbanara rurangaj, mas ministinuca ali microfonogunara. Intiru mundui Randina Oficina 1.000 microfonogunara randisha cachanuca 200 llactaunama.

 Mana ashca cullquira gastangaj shu cutilla ashca microfonogunara randinuca, shu partimalla cachanuca chibi alichinuca intiru munduma cachangaj. Ashca microfonogunara randishcamanda caran shu cachanandi valica 170 dólares. Caita rurasha 20% yali cullquira huacachina ushacanchi.

 Intiru mundui Randina Oficina chita randinuca, cachanuca abril, mayo 2020 huatai, chi quillaunai randingaj shinzhi aca coronavirus ungüimanda. Shinajpi mayo tucurinai ashca shuj shimira pasachingaj carui tiaj oficinaguna, Betel Oficinaguna shinallara shuj shimira pasachingaj lugargunai ña charinuca paiguna ministishcara.

 Intiru mundui Randina Oficinara pushaj Jay Swinney huauqui riman: “Cai tarbanai ali ruranushca Betelmanda Oficina shinallara catujcunas. Jehovahuaj espíritu yanapana ushan uctalla, cullquira mana ashca gastasha huauquiunahuaj tucui ministishcara charingaj”.

 Nicholas Ahladis Shuj Shimiunama Pasachingaj Yanapaj Oficinai tarbaj huauqui riman: “Shuj shimira pasachijcuna llucshingaj mana ushashcamanda ashca cushiyanuca cai mushuj aparatogunara chasquishcamanda. Huauquiunamanda caru tiashas yanapana ushanuca shu shimima pasachingaj, grabangaj yachachishcara uyanaunara, videogunara, canciongunara 500 yali shimiunai”.

 Tucui huauquiuna ¡Tucui huras cushiyaichi! 2020 quinsa punzha asambleara charinuchu ashca tarbanaunara ruranuca. Cai aparatogunara randina ushanuca donate.pr418.com Internet paginai, shuj tunu cuyanai canguna cuyashca cullquihua.