Mu July alimwi a August 2020, bakwesu nyika yoonse, kwaciindi cakusaanguna baleebelela muswaangano wacooko aciindi comwe. Kutegwa eeci cikonzyeke, pulogilamu yoonse yakeelede kusandululwa akulekkoodwa mumyaambo yiinda ku 500. Kanji-kanji, mulimo uuli boobu ulakonzya kutola mwaka omwe naa kwiinda waawo. Pele akaambo kakubbuka kwabulwazi bwa covid 19, basanduluzi bakeelede kucita mulimo ooyu mumyezi iitasiki kuli yone.

 Ba Translation Services alimwi aba Global Purchasing ibabelekela ku Maofesi Mapati aa Bakamboni ba Jehova bakagwasyilizya kapati mumulimo ooyu. Ba Translation Services bakabona kuti basanduluzi banji bakali kuyandika zibelesyo, mbuli mamaikkulofooni mabotu kutegwa baubeleke kabotu mulimo ooyu. Mpoonya ba Global Purchasing bakabikka bubambe bwakuti kuulwe mamaikkulofooni aali 1,000 akutolwa kumasena aatandila ku 200.

 Kutegwa kutabelesyegwi mali manji kapati, mamaikkulofooni akaulwa mubunji, akutolwa kubusena bomwe, mpoonya kubusena ooko bakaalonga kweelana ankwaakali kuunka, kumane bakaatola kumasena aayo. Akaambo kakuti akaulwa mubunji, maikkulofooni yomwe yakaulwa amuulo uusika ku $170 U.S., nkokuti akaccipa a 20 pesenti.

 Ba Global Purchasing bakali kuula zintu eezyi alimwi akuzituma kumasena aayandika mu April a May 2020—aciindi basimakwebo banji nobatakali kubeleka akaambo kabulwazi. Nokuba boobo, kumamanino a May, mamaikkulofooni akasika kumaofesi aabasanduluzi manji, kumitabi iindene-indene, akumasena kumwi nkobasanduluda.

 Ba Jay Swinney, ibalanganya dipatimenti ya Global Purchasing bakaamba kuti: “Kwakali kubelekela antoomwe akati kamadipatimenti aamu Beteli alimwi abasimakwebo nozyakali kuulwa zintu eezyi. Muuya wa Jehova nguwakatugwasya kucita cakufwambaana alimwi akwaabelesya kabotu mali aakasangwa abakwesu.”

 Ba Nicholas Ahladis, ibabelekela mudipatimenti ya Translation Services, bakaamba kuti: “Ibasanduluzi, balo aciindi aawa ibakajalilidwe, bakakkomana kapati kutambula zibelesyo eezyi. Nokuba kuti tabali antoomwe abasanduluzinyina, bakabelekela antoomwe kusandulula akulekkooda makani aamuswaangano, mavidiyo alimwi anyimbo mumyaambo yiinda ku 500.”

 Mulimo ooyu wakuula zintu uli akati kamilimo yakacitwa kutegwa bakwesu nyika yoonse babe a Muswaangano Wacooko Wamu 2020 Wakuti “Lyoonse Amukondwe”! Mali ngomwakasanga kwiinda mukubelesya donate.pr418.com alimwi anzila zimwi akapa kuti cikonzyeke kuula zintu eezyi izyakali kuyandika.