Nga July na August 2020, lu ḓo vha lu lwa u tou thoma vhahashu u mona na shango ḽoṱhe vha tshi ṱalela buthano ḽa dzingu nga tshifhinga tshithihi. U itela uri zwenezwo zwi konadzee, ho vha hu tshi ṱoḓea uri yeneyi mbekanyamushumo i ṱalutshedzelwe nga nyambo dzi fhiraho 500. Kanzhi zwi dzhia ṅwaha kana u fhira u itela u lugiselela buthano, u rekhoda, u ṱalutshedzela nyambo na dzividio. Fhedzi nga nṱhani ha dziedzi ḽa coronavirus, vhahashu vho vha vha tshi fanela u ṱalutshedzela Buthano ḽa 2020 ḽi re na tshiṱoho tshine tsha ri “Dzulani No Takala”! Vho vha vha tshi tea u ita zwenezwo nga miṅwedzi i sa swiki miṋa.

 Vha Muhasho wa u Ṱalutshedzela na vha Muhasho wa u Renga Thundu vhane vha shuma Ofisini Khulwane ya Ṱhanzi dza Yehova, vho thusa kha wonoyu mushumo muhulwane. Vha Muhasho wa u Ṱalutshedzela vho ṱhogomela uri vhaṱalutshedzeli vhanzhi vha ṱoḓa zwishumiswa zwo engedzeaho u itela u ita wonoyu mushumo, zwihuluhulu vho vha vha tshi ṱoḓa khudzaipfi (maikhi) dzine dza shuma zwavhuḓi. Vha Muhasho wa u Renga Thundu vho renga khudzaipfi dza 1 000, vha ita uri dzi iswe fhethu hu ṱoḓaho u vha 200.

 U itela u vhulunga tshelede, vho renga khudzaipfi dzi nnzhi nga khathihi, dza iswa fhethu huthihi nahone ha itwa uri dzi iswe hune vhaṱalutshedzeli vha vha hone u mona na shango. Nga nṱhani ha uri khudzaipfi dzo rengiwa dzi nnzhi nga khathihi, nthihi yo vha i R2 865.37. Dzo vha dzi sa ḓuri musi hu tshi vhambedzwa na tshelede ye ya vha i tshi ḓo badelwa arali dzo rengwa nga nthihi nga nthihi.

 Nga April na May 2020, vha Muhasho wa u Renga Thundu vho vha vha tshi fanela u renga dzenedzi khudzaipfi na u ita uri dzi iswe kha vhaṱalutshedzeli. Nga tshenetsho tshifhinga, mabindu manzhi o vha a sa khou tou shuma zwavhuḓi nga nṱhani ha dziedzi ḽa coronavirus. Fhedzi mafheloni a May, vhunzhi ha ofisi dza u ṱalutshedzela, ofisi dza davhi na huṅwe fhethu hune ha vha na vhaṱalutshedzeli, vho vha vho no wana zwishumiswa zwine zwa ṱoḓea.

 Vho-Jay Swinney vhane vha vha mulavhelesi wa Muhasho wa u Renga Thundu, vho ri: “Mihasho ya Bethele na mabindu o fhambanaho, vho shumisana zwavhuḓi vhukuma musi hu tshi itwa wonoyu mushumo. Ndi muya mukhethwa wa Yehova we wa ri thusa uri ri kone u ita wonoyu mushumo nga u ṱavhanya na uri ri kone u shumisa zwavhuḓi miṋeelo u itela u thusa vhahashu.”

 Vho-Nicholas Ahladis vhane vha shuma kha Muhasho wa u Ṱalutshedzela, vho ri: “Samusi ho vha hu tshifhinga tshee vhathu vha vha vha sa tendelwi u bva mahayani, vhaṱalutshedzeli vho pfa vho ṱuṱuwedzea vhukuma musi vha tshi wana zwenezwi zwishumiswa. Naho vho vha vhe siho fhethu huthihi na vhaṅwe vhaṱalutshedzeli ngavho, vho kona u shumisana vhoṱhe zwavhuḓi u itela u ṱalutshedzela na u rekhoda dzinyambo, matambwa na nyimbo nga nyambo dzi fhiraho 500.”

 Wonoyu ndi muṅwe wa mishumo minzhi ye ya itwa u itela uri vhahashu u mona na shango ḽoṱhe vha kone u ṱalela Buthano ḽa 2020 ḽi re na tshiṱoho tshine tsha ri “Dzulani No Takala”! U ṋeela ha vhoiwe nga mbilu yoṱhe ni tshi shumisa donate.pr418.com na nga dziṅwe nḓila, ndi zwone zwo itaho uri zwi konadzee uri hu rengiwe zwenezwi zwishumiswa zwoṱhe.