For the first time, Jehovah Witness people for the whole world go watch the regional convention for the same period for the month of July and August 2020. To fit do this one, they go need to translate and record the program for more than 500 language. To prepare and complete this kind program de normally take about one year or even pass. But as things come be because of the coronavirus, the brothers and sisters wey go translate the 2020 “Always Dey Happy”! Regional Convention no even get reach four months to finish the work.

 Translation Services and Global Purchasing department for Jehovah Witness World Headquarters help for this big project. Translation Services department see-am say many of the translation team them go need more tools to fit do the work, especially tools like good microphones. Global Purchasing department come arrange to help them buy 1,000 microphones and send the microphones go about 200 different areas wey the translation teams dey.

 To save money, they buy plenty microphones at once, come send all of them go the same place. Then from there, they come count and separate the microphones and send them go give the translators for different part of the world. One microphone plus the money wey they go use send-am come, fit cost reach 94,500 francs or 61,200 naira. But as they buy all the microphones at once, e help us save more than 18,900 francs or 12,200 naira for each of the microphone.

 Global Purchasing department do all this one for the month of April and May 2020​—time wey plenty business don close because of coronavirus. But even with that one, by the end of May, almost all the translation office for different part of the world, don get the microphone to do their work.

 The overseer of the Global Purchasing department, Jay Swinney, talk say, “The departments for Bethel and the different company from outside wey get hand for this arrangement, really work together with us. Na only the spirit wey Jehovah de give fit help us to give our brothers and sisters wetin they need for this small time and for that kind price.”

 Nicholas Ahladis wey de work with Translation Services department talk say: “As the translators dey for lockdown, they really dey happy say they get this tool wey they really need. Even though say they no dey together with other members of their team for the same place, they fit connect together to translate and record the talks, dramas and the songs for more than 500 language.”

 This na one of the many project wey we need to finish to fit produce the 2020 “Always Dey Happy”! Regional Convention for brothers and sisters for the whole world. Wetin make us fit buy this tools na because of the fine way wey wuna de make wuna contributions for donate.pr418.com and for other ways.