Vo sambany tamy fanjava Zie ndreky Aoty 2020 in̈y, niran̈a fotoan̈a nizahavany rahalahy erantany programony fivoriambeny vondroparitry. Navitan̈a zen̈y, nila nadika tamy volan̈a mandilatra 500 izio. Matetiky mandany taon̈o araiky na mandilatra zen̈y, fandaminan̈a asa karaha io, fangalan̈a feo, fandikan̈a kabaro jiaby ndreky video jiaby. Fa nohony fisiany valan̈aretin̈y Coronavirus, tsy ampy efatra fanjava fotoan̈a nanan̈andro rahalahy ndreky ranabavy pandika teny nandika Fivoriambeny Vondroparitry 2020 “Miravoravoa Fo”! in̈y.

 Sampanasany Fandikanteny ndreky Sampanasany Fividianan̈a Entan̈a amy Foibeny Vavolombelon̈o Jehovah an̈y nan̈ampy mare tamy tetikasa maventy be io. Nahafahan̈a navita asa io, hitany Sampanasany Fandikanteny fa maro taminy ekipiny pandika teny aby io nila fitaovan̈a fan̈ampiny, ke niavaka tamizen̈y mikro tsara feo maromaro. Ke Sampanasany Fividianan̈a Entan̈a nandamin̈y fivangan̈a mikro 1 000, avio nalefandro amy tany kadiriny 200.

 Hitsitsian̈a vola, Sampanasany Fividian̈an̈a Entan̈a nivanga mikro marobe. Naterin̈y tamy toeran̈a araiky iro mikro aby io koa fa voavanga, avio baka tao iro io nalefa tamindro pandika teny aby in̈y. Azony atsika nivanga mikro marobe indraiky mipaka in̈y, nijotso vangany araiky ke loso 170 dolara (650 000 Ar), tafiditry amy zen̈y fandifasan̈a izy. Izikoa ampiran̈iny amy vangany mikro araiky izio, nahazo tombony 20 isanjato atsika.

 Tsy maintsy nivangainy Sampanasany Fividianan̈a Entan̈a fo fitaovan̈a aby io, avio nalamindro fo koa fandifasan̈a iro taminy Avrily ndreky May 2020. Fa nohony valan̈aretin̈y, nisy erany raha azo natao tamy fivangan̈a ndreky fandifasan̈a entan̈a aby io. Fa ndray tio raha zen̈y, ankamarozany birôny fandikanteny mitokana, birôny sampan̈a, ndreky toeran̈a hafa misy fandikanteny, samby nahazo fitaovan̈a nilaindro aby, tamy faramparany fanjava May.

 Karaha ty nivolan̈iny Jay Swinney, amy Sampandraharahany Fivangan̈a Entan̈a Erantany: “Niaraka niasa tsarabe tamindro sampandraharaha amy Betela eto iro pandraharaha samy hafa, tamy tetikasa araiky ty. Nalaky vita raha jiaby sady niasa tamy fomba tsara koa fan̈amezan̈a, baka han̈ampian̈a iro rahalahy ndreky ranabavy aby io. Tsy vita foeky raha zen̈y izikoa tsy tiô fan̈ahiny Jehovah.”

 Karaha ty ho Nicolas Ahladis, amy Sampandraharahany Foibeny Fandikanteny: “Nahazo tamy fitaovan̈a aby io iro pandika teny tamy tany efa nisy confinement. Nankahery iro mare raha zen̈y. Iro ekipy aby io baka nahavita niaraka niasa fo, ndray iro tsy tamy tany araiky, nandika ndreky nangala feo iro kabaro ndreky tantara, baka io hira amy volan̈a mandilatra 500 karazany.”

 Fivoriambeny Vondroparitry 2020 “Miravoravoa Fo”! io natao niny rahalahy ndreky ranabavy erantany. Araiky tamindro tetikasa natao han̈aboahan̈a izio fo nikoran̈intsika tato, fa maro iro io. Ke fan̈amezan̈a nataonaro tamy donate.pr418.com ndreky tamy fomba hafa koa nahavitan̈a nivanga iro fitaovan̈a aby ten̈a ilain̈a io.