Samblia de tzón govitz íz 2020 dipa sialadxno láani. Por primer buelt, góc grabar programa reʼ toibsi midid par guibiʼno láani ló beʼo july né agost ló guidopynac Gudxlio. Par labúu gacni scú, samblia reʼ góc traducirni ló más de 500 diitz. Nírcu herman gocla midid tobiz o más par ñony dxiinreʼ. Xtol COVID-19, guirá ni buny traducir samblia íz 2020 «¡Colguibaladx guirá ór!» tap beʼosi gopyibu par ñonyibu láani.

 Departamento Mundial de Compras né departamento de Servicios de Traducción ni noʼ central mundial, bunyibu dxiin loguiaʼni. Servicios de Traducción bidudy cuent que xidal traductores biquiinyibu más herramientas, máspa micrófonos ni rony grabartzay. Departamento Mundial de Compras gosiʼ 1.000 micrófonos né bixel láani midid 200 lagary.

 Par diti ñonyibu xiroʼ gaxt bidxiich, gosiʼyibu láani por mayoreo, bixelyibu láani toibsi lagary de ngú bixelyibu láani ló guidopynac Gudxlio. Tigaaga micrófono ni gosiʼyibu né ni bixelyibu bireʼni midid 170 dólares. Buny ahorraryibu más de 20%.

 Departamento Mundial de Compras gonab láani ló abril né may íz 2020, merpa ló dzúcu guirá negosy diti tampa cayonyni dxiin. Ná scú, guic may casi guirá oficinas de traducción ni noʼ sit, sucursales né stipnés lagary ro rac traducir gopyibu guirá ni caquiinyibu.

 Jay Swinney, ni rabiʼ ximod rony dxiin Departamento Mundial de Compras, ná: «Ló guidopyca dxiinreʼ, tanli departamentos de Betel né buñ ni ratoʼ, sacró bunyibu dxiin. Nosi espíritu xtuny Jehová labúu radudy ni caquiin herman naguel né barat».

 Nicholas Ahladis, ni rony dxiin ló Servicios de Traducción, ná: «Traductores ni nayeg yoʼ nigolú bibaladxyibu portín bidxin guirá ni caquiinyibu. Ná sit goyoʼyibu de xcompañeryibu, labúu gocnéyibu par ñac traducir né ñac grabar discurs, videos né canción ló más de 500 diitz».

 Ndeʼ nac toibtica dxiin ni góc par labúu nareʼ samblia de tzón govitz íz 2020 «¡Colguibaladx guirá ór!». Tanli micrófonos né stipnés cós ni biquiin traductores, labúu bidzelni por guirá donación ni raxelto ló donate.pr418.com né ni raxelto de stipnés mod.