Avbe vidio ne ima ghee vbe asikoko odin ọghomwa wa mu ima ekhọe, ọ vbe ru iyobọ ne ima ya rẹn otọre sayọ ighẹ imamwaemwi ni rre Evbagbẹn Nọhuanrẹn. Avbe vidio na ghee re vbe Asikoko Odin Ọghe 2020 nọ mwẹ uhunmwuta nọ khare wẹẹ, “Wa Gha Sọyẹnmwẹ Vbe Ẹghẹ Hia”! keghi re 114, avbe ọta ne Ẹbu Nọ Su kevbe etẹn ni ye iran obọ ya guan keghi re 43. Uwẹ he ka muẹn roro ẹdẹ, ẹrhiọn kevbe igho na loo ya ru avbe vidio na ra?

Etẹn nikpia kevbe etẹn nikhuo ni rhie odẹ 900, ẹre ọ loo ẹghẹ kevbe ifuẹro ọghe iran ya ru iyobọ ye emwamwa asikoko na. Ọ gberra ukpo eva ne iran ya ru avbe iwinna na, a gha ku ẹghẹ hia ne iran loo ro kugbe, ọ gha sẹ odẹ ughaẹdẹ 100,000. Vbuwe ughaẹdẹ 100,000 na kha na, ughaẹdẹ 70,000 ẹre a ya ru ikueta ọghe ifuanro 76 nọ mwẹ uhunmwuta nọ khare wẹẹ, E Nehimaia: ‘Oghọghọ Ne Jehova Rhie Ne Uwa Gha Ya Uwa Wegbe.’

Uwa rẹnrẹn wẹẹ, igho ọrhẹnrhẹn ẹre a khian loo ya gbaroghe emwa ni rhiegbe ladian ya ru iwinna na. Igho ẹre a khian vbe loo ya kpemehe avbe emadogua ne iran khian gha loo, emwi ughughan na khian ya gha ru iyobọ ne iran kevbe ehe ne iran khian na vbe gha ru iwinna iran.

Jared Gossman nọ winna vbe Audio/⁠Video Services keghi kha wẹẹ, “Agbaziro Ọghe Ẹbu Nọ Su Nọ Siẹnro Imamwaemwi wa hoo na gha bẹghe ẹvbo ughughan kevbe vbene etẹn ni rre avbe ẹvbo na ya ru emwi hẹ vbe avbe vidio ọghe ima. Obẹlẹ na gha rhie ẹre ma wẹẹ, emwa ni ke ẹvbo ughughan rre ẹre Avbe Osẹe Jehova gele khin. . . . Na mieke na sẹtin ru ọna, ẹbu etẹn 24 ni ru e vidio vbe otọ ẹvbo 11, keghi ku obọ kugbe ya ru avbe vidio na. Egbe iwinna vbenian ne etẹn ughughan vbe uhunmwu otagbọn khian na gha mwẹ obọ keghi gbe igho, na do mwamwaẹn kevbe na vbe do dia re i re iwinna ne kherhe.

Vbe vidio nibun ne ima ru, ma keghi loo avbe emadogua ne kpataki kevbe avbe emwi na loo ya bọlọ egbe ekẹn kevbe ehe ughughan ne a na ru e vidio na tie ẹre sets. Vbe igiemwi, uwu e studio ọghe ima nọ rre Mt. Ebo vbe ọkpẹn Patterson, New York, U.S.A., ẹre a na bọlọ avbe egbe ekẹn na loo ro ya ru ikueta ọghe E Nehimaia: ‘Oghọghọ Ne Jehova Rhie Ne Uwa Gha Ya Uwa Wegbe.’ Ma ma hoo ne ima mu igho rhia, sokpan, ma vbe hoo ne emwi hia ne ima khian mu ladian vbe ikueta na gele gha yevbe emwi na ghaa miẹn vbe ẹghẹ nẹdẹ. Rhunmwuda ọni, ma keghi bọlọ emwi eso ni yevbe egbe ekẹn ọghe Jerusalẹm nẹdẹ. Utanmwẹ ọghe dọmwadẹ egbe ekẹn kegha re ibata 20, ma keghi ya e foam ya gue avbe erhan ne ima ya kun egbe ekẹn na, ma na vbe paint ẹre nọ mieke na gele yevbe okuta. Avbe egbe ekẹn ne ima ya erhan kevbe foam ru na keghi re na gha sẹtin gha mu yo mu rre, rhunmwuda ọni, ma gha sẹtin loo ẹre vbe ihe ughughan. Ọna keghi fiaẹn kanmwa, inu egbe ekẹn ne ima khian loo ya ru nene ikueta. Ọrheyerriọ, igho ne ima ye loo ya ru avbe egbe ekẹn ne ima ya ru ikueta na ọkpa, rhie odẹ $100,000 (U.S.). *

Ne ima na ghi rẹn ena hia nẹ, ẹi mwẹ ima ma gbọyẹmwẹ ye emwamwa ọghe asikoko odin ọghe ukpo na. Ma mwẹ ilẹkẹtin wẹẹ, ẹrhiọn na loo ro ya ru emwamwa asikoko na gha ya emwa vbe ehe hia vbe uhunmwu otagbọn na rhie urhomwẹ gie Jehova. Ma kpọnmwẹ uwa ne uwa na ye donate.pr418.com kevbe obẹlẹ ọvbehe, ya ru iyobọ ye iwinna Arriọba nọ khian vbe ehe hia vbe uhunmwu otagbọn na.