Bia nye’e bevidéo ya beta bitôkan angôndô, amu ba volô bia na bi kôme wô’ô miñye’elane ya Bible. Bevidéo 114 be nga kui beta étôkan a mbe nlô ajô na “Va’ane kom ése”! E tañ éte, ba lañe fe minkañete 43 bobejañe ya Tin ékôan a bevolô bap be nga bo. Ye wo yem abim ésaé é nga boban a abime moné e nga sili asu na bi kuli bevidéo bete?

 Bebé bobejañ a besita 900 be nga belan éyoñe jap a atyeñe mboane mame dap asu na bevidéo bete be kui. Ésaé éte é nga nyoñe be jôm ane mimbu mibaé, be nga bo je mewolo me nkolo bebé 100 000. Drame Nehémie étam a nga nyoñe mewolo 70 000. Drame ate a ne nlô ajô na “Ava’a Yéhôva nde e ne ngule jenan,” a bo ki minute 76.

 Avale mia yem, e nga sili abui moné asu na be kuse bobejañe be nga bo ésaé éte biôm bia sili, ataté asu menyôle map, akekui biôm bisaé.

 Jared Gossman, mojañe wua ya ba ba bo ésaé éte a jô na: “Émo’o asu ñye’elane ya Tin ékôane ja yi na bevidéo bangane be ngôné metume ya mesi mese. Amu bia koone bobejañe meku’u mesi menyin, a jam ete da yiane kôme yené bevidéo. Jôm ete nje bikip 24 e mesi 11 bi nga futi wo ésaé éte. Jam ete e nga sili abui moné, abui mefek, a mbamba nta’ane mam.”

 Ane ô vaa nalé, asu na bi kuli bevidéo béziñ, da sili bia beminsini, mingume mi biôm, a bevôm be ne ngum aval. Bi tame kobô ve ajô vidéo Néhémie: “Ava’a Yéhôva nde e ne ngule jenan.” Bi nga bo nye studio ya Mt. Ebo, fefele Patterson, e New York, Amelka. Bi mbe bi yi na e yené vidéo ve ane bi ne melu mvus, ve bi nji be bi kômbô’ô ndamane moné zezé. Nde bobejañe be nga kôme biôme biziñ bi too ôveves, ve bi funa’ane bi be mbe be bela’ane bie Jérusalem. Biôm bite bi mbe nkôman a mebam, be nga ka’a me a buti me a bibubute bindelé; jôm ése é mbe é ve’e méta ésaman, be nga mane du’u bie meyañ asu na bi funane beta mekok. E mbe tyi’ibi ya be’e bie a belane bie asu abui bescène. Ve to’o nalé, bi nga jañele bebé dollar 100 000 asu drame ate étam étam. *

 Nga mi lôô na e bi beta étôkane mbu wu a nji be mone jam? Bi too ndi na mengule mese bobejañe be nga ve na beta étôkan ate a boban me nji jaé ntuk, Yéhôva a nga nyoñe fo’o duma. Akiba abui a bobejañ a besita amu mimveane mienan, mmie mite mia bo a zene ya donate.pr418.com nge ke a mezene mefe.