El maga video del diaton asemblea de region ya alcanza gayot na diaton corazon y ya ayuda kanaton para mas entende con el maga enseñanza del Biblia. El 2020 “Pirmi Queda Alegre”! Asemblea de Region tiene 114 maga video, incluido el 43 talk que ya dale el maga miembro del Cuerpo Gobernante y el diila maga ayudante. Ya puede ba tu pensa si paquemodo de grande trabajo y gasto el envuelto para hace con este maga video?

 Cerca 900 del diaton maga hermano y hermana estaba na entero mundo el ya dale el diila tiempo y abilidad para ayuda hace con este programa. Todo-todo, ya usa sila maga 100,000 hora adentro de dos año para con este proyecto. Incluido aqui el 70,000 hora para completa con el 76-minuto drama que base na Biblia, Nehemias: El Alegria de Jehova el De Ustedes Fuerza.

 Como cosa ustedes puede imagina, bien grande el gasto para dale el necesidad del maga voluntario, incluido ya el maga technical support, equipment y maga facilidad que necesita para completa con el trabajo.

 “El Teaching Committee del Cuerpo Gobernante quierre inclui maga diferente cultura y locacion na diaton maga video. Por medio con ese, puede kita dale mira que un organizacion kita que estaba na entero mundo,” ya habla si Jared Gossman, quien ta trabaja na Audio/Video Services. “Para cumpli con este, tiene 24 team na 11 diferente nacion que ya trabaja junto para na este proyecto. Necesita grande cantidad de sen, plaña enbuenamente y cooperacion para puede trabaja junto el maga gente estaba na entero mundo.”

 Manada del diaton maga video el necesita tambien especifico equipment y maga set para na drama. Por ejemplo, el maga set para na Nehemias: El Alegria de Jehova el De Ustedes Fuerza ya hace adentro na studio na Mt. Ebo cerca na Patterson, New York, U.S.A. Para puede usa enbuenamente con el maga donacion y dale mira el exacto ichura del set, el maga hermano necesita construi con el liviano set que el diseño de este ta semeja na pader del Jerusalem de antes. El cada estructura de este que hacido de palo tiene seis metro de alto (20 pies) y ya pone con este foam que ya pinta para queda igual como piedra. Puede move con este maga “pader” para usa na diferente ecsena y como resulta, ya menggua el necesita set para usa na otro ecsena. Maskin pa ansina, cerca $100,000 (U.S.) el necesita para construi con el maga set del drama pa lang. a

 Mas hay aprecia kita con el asemblea de region na este año cay ya sabe kita con este maga detalle. Puede kita asigura que el esfuerzo que envuelto para hace con este programa, puede ayuda con el diaton maga hermano y hermana na entero mundo para alaba con Jehova. Gracias na de ustedes maga donacion para na trabajo na entero mundo por medio na donate.pr418.com y na otro pa maga manera.