Ang mga video sa atong rehiyonal nga mga kombensiyon nakatandog sa atong kasingkasing ug nakatabang nato nga mas masabtan ang gitudlo sa Bibliya. Ang 2020 “Paglipay Kanunay”! Rehiyonal nga Kombensiyon dunay 114 ka video, apil ang 43 ka pakigpulong nga gihatag sa mga membro sa Nagamandong Lawas ug sa ilang mga katabang. Gusto ba kang mahibalo kon unsa ka dakong trabaho ug kuwarta ang nalangkit sa paghimo niini nga mga video?

 Halos 900 ka brader ug sister sa tibuok kalibotan ang miboluntaryo sa pagtabang niini nga proyekto. Sa katibuk-an, migugol silag halos 100,000 ka oras niining duha ka tuig nga proyekto. Apil niini ang 70,000 ka oras nga gikinahanglan aron makompleto ang 76 minutos nga Bible drama nga Nehemias: “Ang Kalipay nga Gikan Kang Jehova Mao ang Inyong Salipdanan.”

 Siyempre nagkinahanglag dakong kuwarta aron matagan-an ang panginahanglan niining kugihan nga mga boluntaryo, apil na ang technical support, mga equipment, ug mga pasilidad nga ilang gikinahanglan aron makompleto ang trabaho.

 “Gusto kaayo sa Komite sa Pagpanudlo sa Nagamandong Lawas nga makita ang lainlaing kultura ug lokasyon diha sa atong mga video. Pinaagi niini, mapakita nato ang atong tinuod nga panag-igsoonay sa tibuok kalibotan,” miingon si Jared Gossman, nga nagtrabaho sa Audio​/Video Services. “Aron mahimo kini, 24 ka team sa 11 ka nasod ang nagtinabangay niini nga proyekto. Kay daghang team ang nalangkit, gikinahanglan ang dakong kantidad sa kuwarta, pagplano, ug koordinasyon.”

 Daghan sab sa atong mga video ang nagkinahanglag espesyal nga mga equipment ug mga set. Pananglitan, ang mga set para sa Nehemias: “Ang Kalipay nga Gikan Kang Jehova Mao ang Inyong Salipdanan” gitukod sulod sa Mt. Ebo studio duol sa Patterson, New York, U.S.A. Aron makadaginot sa pondo ug sa samang higayon makahimog tukma sa kasaysayan nga mga esena, ang mga igsoon naghimog lightweight nga mga set nga kon tan-awon mora gyog paril sa karaang Jerusalem. Ang matag paril hinimo sa kahoy nga frame nga dunay gihabogong sayis metros, nga gihaklapag foam ug gipinturahan aron morag bato tan-awon. Kini nga “mga paril” mabalhinbalhin aron magamit sa ubang esena, maong namenosan ang gidaghanon sa mga set nga angayng himoon. Bisan pa niana, halos $100,000 (U.S.) ang nagasto sa paghimog mga set niini pa lang nga drama. a

 Ang pagkahibalo niini nga mga detalye magpalalom sa atong apresasyon sa programa sa rehiyonal nga kombensiyon niining tuiga. Seguradong madayeg si Jehova sa tibuok kalibotan tungod sa mga paningkamot sa paghimo niini nga programa. Salamat kaayo sa inyong mga donasyon sa worldwide work nga gihatag pinaagi sa donate.pr418.com ug sa ubang paagi.