Asamblea regional bideorabara dayirã soidu jʉ̃ẽbibʉ akʉza audre ũrĩbibʉ Daizeze Bedʼeata. Asamblea regional 2020de «Ewari Jõmaʉ̃nẽ Sobiapanaidua» bʉ 114 bideo maʉ̃nebemata 43 bideo bʉ Zõrãrã Burubia ãba yi jʉrepanʉraba diskurso diadata akʉza yi kʼarebabariraba. Maraba widibarika, ¿kʼãrẽaba gastapanʉta platade akʉza sõbe ewari trajapanʉta naʉ̃ oita?

 Mebẽrã 900 panʉraba diasida ãyi ewarita akʉza ãya nekʼãrẽ okʼawuabʉdeba kʼareba osida naʉ̃ asambleara, naʉ̃ asamblea odaira poaga ume basi maʉ̃ne osida 100 mil ora. Maʉ̃nebemata 70 mil ora zokʼasida pelikula oita Nehemías «Jeowa sobiara dayirã zarea».

 Naʉ̃ pelikula oira plata mejãcha gastasida akʉibarabasi baera mebẽrã yi kʼarebanʉmʉ akʉita yi grababari ũduita akʉza sama odai jʉrʉita.

 Jared Gossman bideora obariraʉ̃me trajabʉba jarasi: «Mebẽrã nãã jaradiabarirabara kãgapanʉ drʉata akʉza ẽbẽra naʉ̃ drʉazadebemata bideo ũdubidamarẽã mawũã ũdubita mebẽrã naʉ̃ drʉa jõmaʉ̃nebemata». Naʉ̃ bideora oira mebẽrã drʉa 11 bʉdebemata trajasida mawũã oira nesidabasi platata, ewarita akʉza bia daucha zokʼaita naʉ̃ bideo grabakʉaira.

 Zokʼaibarabasi kamara yibiata akʉza daiba de grabaimaera ara biʼia oibarabasi Nehemías pelikula «Jeowa sobiara dayirã zarea» oira ara bia odaibara basi Mount Ebo estudiota Patterson, Nueva York kʼawa. Pelikula dayirã biʼia ũdudaita akʉza plata mejãcha gastada ẽ baita mebẽrãbara parãsida muro pã ãya edeseabʉta naʉ̃ muro oira bakuruba osida yi ʉ̃tʉata 6 metro basi, maʉ̃ ʉ̃rʉ kʼarakʉasida nekʼãrẽba mõgara kĩrãkʼa bamarẽã, naʉ̃ murora ãya edeseabasi ãya ede krĩchabʉma mawũã nekʼãrẽ ara bia okʉaira nesida ẽ basi. Mawũãsimina pelikulade nekʼãrẽ bia ara bia ũdubira gastasida $ 378.000.000. a

 Naʉ̃ asamblea sãwũã oda kʼawuabʉrʉba dayirã mejãcha kãgabibʉ. Asambleara kʼawuapanʉ naʉ̃ba ẽbẽra jõmaʉ̃ta ibia bedʼeabita Jeowa ʉ̃rʉ. Biga maraba plata soiduba diabʉ kʼarea donate.pr418.com.