Nida sarava na vidio ni soqo ni veiwasewase, e dau tara na lomada qai vakatitobutaka na noda kila na iVolatabu. Ena soqo ni veiwasewase ni 2020, e kena usutu ‘Meda Marau Tiko Ga’! e laurai kina e 114 na vidio, kei na 43 na nodratou ivunau na lewe ni iLawalawa Dauvakatulewa kei ira na dauveivuke. O bau kila na levu ni cakacaka kei na ilavo e vakayagataki mera vakarautaki kina na vidio kece qori?

 E voleka ni 900 na tacida mai veiyasa i vuravura era lomasoli ni solia na nodra gauna kei na kila mera veivuke kina ena kena vakarautaki na porokaramu. Era vakayagataka kina e voleka ni 100,000 na aua ena loma ni rua na yabaki. E wili tale ga kina e 70,000 na aua me vakarautaki kina na drama vakaivolatabu e 76 na miniti na kena balavu, na kena usutu Niemaia: “Nomuni Koro Kaukaua na Marau e Solia o Jiova.”

 Macala ga ni dua na ilavo levu e vakayagataki me vakarautaki kina na veika me baleti ira na bolecakacaka me vaka na nodra vukei, nodra iyaya ni cakacaka kei na nodra vakaicilitaki.

 Qo na ka e kaya o Jared Gossman, e veiqaravi ena tabana ni Vidio kei na Katokatoni: “E vinakata sara ga na Komiti ni Veivakavulici ni iLawalawa Dauvakatulewa me vakaraitaki mai ena noda vidio na duidui vanua kei na kena itovo. Ni lewena na isoqosoqo na mataveitacini mai veiyasa i vuravura, ena totoka sara ga ni laurai tale ga qori ena vidio. Era lesi kina e 24 na timi mai na 11 na vanua mera cakava qori. Me rawa nira cakacaka vata na tacida mai na veiyasa i vuravura, ena vinakati kina na ilavo kei na tuvatuvanaki.”

 Me rawa ni vakarautaki e levu na vidio, ena vinakati kina na kena iyaya kei na vanua me katoni kina. Kena ivakaraitaki, e vakarautaki na vanua me katoni kina na drama kei Niemaia: “Nomuni Koro Kaukaua na Marau e Solia o Jiova” ena vanua e dau caka kina na vidio e Mt. Ebo volekati Patterson, e Niu Yoka, Merika. Me rawa ni vakayagataki vinaka na cau qai donu tale ga na ka e laurai ena drama, era tara na tacida na lalaga mamada me vaka tu na rairai ni bai kei Jerusalemi ena gauna makawa. E 6 na mita na kena cere na lalaga, e ologa tu na meteresi qai boroi me vaka na irairai ni vatu. E rawarawa na kena veikauyaki me vakatau ena vanua me vakaraitaki mai ena drama, e vakabula ilavo gona. Ke vakarautaki e dua na vanua me tabaki ena drama ena vakayagataki kina e $100,000 na ilavo ni Merika. a

 Na noda kila na veika kece qo eda na lai marautaka sara kina vakalevu na noda soqo ni veiwasewase ni yabaki qo. Eda nuidei ni yaga na sasaga kece e vakayagataki ena kena vakarautaki na porokaramu nira na lagiti Jiova kina na tamata mai veiyasa i vuravura. Oni vakavinavinakataki vakalevu ena nomuni lomasoli ni cau ena donate.pr418.com kei na so tale na sala.