Ang mga video sa aton rehiyonal nga mga kombension nagtandog gid sa aton tagipusuon kag nagbulig sa aton nga mas maintiendihan ang ginatudlo sang Biblia. Ang 2020 ‘Magkasadya Pirme’! nga Rehiyonal nga Kombension may 114 ka video, lakip ang 43 ka pamulongpulong sang mga miembro sang Nagadumala nga Hubon kag sang ila mga kabulig. Napamensaran mo bala kon paano ini ginahimo kag kon pila ang ginagasto para mahuman ini nga mga video?

 Halos 900 naton ka kauturan halin sa bilog nga kalibutan ang nagboluntaryo sang ila oras kag abilidad para magbulig sa paghimo sini nga programa. Kon totalon, halos 100,000 ka oras ang ila gingamit para sa sini nga proyekto sa sulod sang duha ka tuig. Nalakip diri ang halos 70,000 ka oras nga kinahanglan para mahimo ang 76 minutos nga Bible drama nga Nehemias: “Ang Kalipay ni Jehova Amo ang Inyo Pamakod.”

 Pareho sa ginapensar mo, daku ang gingasto para sa ilistaran sining masinakripisyuhon nga mga boluntaryo, pati man sa mga props, equipment, kag pasilidad nga kinahanglanon para mahuman ini nga proyekto.

 “Gusto gid ipakita sang Teaching Committee sang Nagadumala nga Hubon ang sarisari nga mga kultura kag mga lugar sa aton mga video. Kay man, bilog nga kalibutan ang aton paghiliutod kag dapat makita ini sa mga video,” siling ni Jared Gossman, nga naasayn sa Audio/Video Services. Para mahimo ini, 24 ka team sa 11 ka pungsod ang nagbuligay sa sini nga proyekto. Nagakinahanglan gid ini sang daku nga gasto, pagplano, kag kooperasyon.”

 Madamo sa sini nga mga video ang nagakinahanglan sang espesyal nga mga equipment kag mga set. Halimbawa, ang mga set para sa Nehemias: “Ang Kalipay ni Jehova Amo ang Inyo Pamakod” ginhimo sa sulod sang studio sang Mt. Ebo sa Patterson, New York, U.S.A. Ginpanikasugan gid nga magamit sing maayo ang mga donasyon, gani ang mga kauturan naghimo sing artipisyal nga mga pormas nga daw pareho sa pader sang dumaan nga Jerusalem, para sibu gid sa kasaysayan ang makita sa video. Human ini sa kahoy kag sa mamag-an nga materyal nga nagataas sing anom ka metros, nga ginputos sang foam, kag ginpinturahan nga daw pader nga bato. Ini nga mga “pader” puede saylusayluhon depende sa eksena, gani nabuhinan ang kadamuon sang mga set nga dapat nila himuon. Bisan pa sini, naggasto sing halos $100,000 (U.S.) para sa paghimo sang mga set sa sini nga drama. a

 Ini nga mga impormasyon nagabulig sa aton nga apresyahon pa gid ang aton rehiyonal nga kombension sini nga tuig. Nagasalig kami nga ang mga panikasog sa paghimo sini nga programa magadayaw kay Jehova sa bilog nga kalibutan. Salamat gid sa imo maalwan nga donasyon para sa bilog kalibutan nga hilikuton paagi sa donate.pr418.com kag sa iban pa nga paagi.