An videos axi ban Púlik tamkuntaláb regional tu kulbédhanchal i ichích ani tu tólmiyal abal ki exbay más alwaʼ an Biblia. Ban púlik tamkuntaláb regional axi ti 2020 «¡Etsʼey kit kulbejchik!» waʼats 114 i videos ani 43 pel i tʼilomtaláb axi in bínaʼ an epchalchik axi kʼal an Kwenél i Ókʼnom ani in tolmiwálchik. ¿A tsalpayámal jáy i tʼojláb ani i tumín eyendháj abal ka tsʼejkáj axéʼ xi videos?

 Utat 900 i epchalchik axi tin puwél an tsabál, in bínaʼ in tʼojlábil ani an kʼij abal ka tsʼejkáj axéʼ xi púlik tamkuntaláb. Al tsab i támub eyendháj utat 100.000 horas abal axéʼ xi tʼojláb. Kʼal axéʼ xi kʼij, eyendháj 70.000 abal ka tsʼejkáj an videos axi in bij Nehemías: An kulbetaláb axi tu pidhál a Jehová tu tsapikmedhál axi ówel 76 i minutos

 Chubax in yéjenchij yan i tumín abal ka pijchiyat ani ka beletnáj an epchalchik axi tólmix, abal ka tsʼaʼiyat an computadora, an cámaras ani abal ka áliyat juʼtáj ti neʼets ka tʼajan an grabación.

 A Jared Gossman, axi u tólmix ti Audio ani Video, in ulal: «An epchalchik axi ban Comité de Enseñanza kʼal an Kwenél i Ókʼnom, in léʼ abal ban videos, ka tejwaméj i epchalchik axi al pílchik i kwénchal ani in káwintal. Antsanáʼ u tejwamél abal in bichówil a Jehová junkudh. Abal axéʼ xi tʼojlab, an epchalchik axi tin puwél an tsabál tʼójon 24 i equipos al 11 i países. Ani jayej in yéjenchij yan i tumín ani jayej in yéjenchij ka tsálpayat jantʼiniʼ ti neʼetsak ka tʼajan axéʼ xi tʼojlab».

 Abal ka tsʼejkáj axéʼ xi videos in yéjenchij i patʼál axi kʼibat ka elaʼ ani jayej an atáj ka tejwaméj ejtíl ti biyál. Abal ka tsʼejkáj an video, Nehemías: An kulbetaláb axi tu pidhál a Jehová tu tsapikmedhál tsʼejkáj an atáj ani juʼtáj ti neʼets ka tʼajan an grabación ban estudio ti Mount Ebo, utat ti Patterson (Nueva York). Abal ka eyendháj alwaʼ an donaciones ani ka tejwaméj ejtíl ti biyál, an epchalchik in tsʼejkaʼ an pakdhaʼ baʼteʼ kʼal jantʼoj axi lej ikʼów ani tejwaméj ejtíl axi kʼwájatak ti Jerusalén ti biyál. In tʼekʼem an baʼteʼ 6 metros ani kʼwájatak tsʼejkadh kʼal i téʼ axi ikʼów ani mukudh kʼal i pintura axi in tʼipoyal an tʼujub. Lej alwaʼ abal antsanáʼ ti tsʼejkáj, kom in éjtowalakchik kin yatsiy tam kin yéjenchij ani antsanáʼ ka tʼajan an grabación al kʼeʼat i péjach ban video. Antsanáʼ ti eyendháj más alwaʼ an tumín. Bélits antsanáʼ pákuwat 2 millones de pesos. a

 Xowéʼ abal i exlál axéʼ, i pidhál más in jalbíl an púlik tamkuntaláb abal axéʼ xi támub. Ani i lej belál abal patal axéʼ xi tʼojlab ani tsapláb, neʼets kin tʼajaʼ abal ka puwénchat a Jehová tin puwél an tsabál. I lej kʼakʼnál patal an donaciones axi a binálchik abal an obra mundial tidonate.pr418.com ani ti tamkuntaláb.