Gafu ta video ira ta rehional ira nga kombensiottam, matukkal i futu tam anna mas malippawa tam i tuttuddu ira na Biblia. Egga i 114 nga video ta 2020 “Magayayya Kanayun”! nga Rehional nga Kombension. Nelagum tatun i 43 nga palappa na miembro ira na Manangngal nga Baggi anna na helper da ira. Nanono mu ngana kari nu kunnasi kadakal nga trabahu i pagangngua tu video anna nu piga i nagastu tatun?

 Maggi 900 nga wawwaragi tam ta interu mundo i nanuffun tapenu mapadday i programa. Maggi 100,000 nga oras i inusada ta unag na dua nga ragun para ta proyekto. Nelavu tatun i 70,000 nga oras nga niyusada para ta 76 nga minuto nga drama nga nebase ta Biblia nga Nehemias: “I Pagayayya Kani Jehova i Sikannu.”

 Siempre, dakal i nagastu tapenu meyawa i pakawagan ira na minassakrifisio ira nga boluntariu, kunne na gapa i teknikal ira nga kawagadda, i equipment, anna fasilidad ira tapenu mabalidda i trabahu.

 “Kakayà na Teaching Committee na Manangngal nga Baggi nga mepasingan ta video tam ira i nadduruma nga kultura anna lugar. Maddian gare i wawwaragi tam ta nadduruma nga lugar ta interu mundo yayya nga kayà tam yatun nga ipasingan ta video tam ira,” kunni Jared Gossman nga mattrabahu ta Audio/Video Services. “Tapenu metuppal yaw, 24 nga team ta 11 nga nasion i nadduruffun taw nga proyekto. Kawagan i dakal nga kuartu, aru nga papplano, anna padduruffun na aru nga totolay ta interu mundo para tatun nga trabahu.”

 Kawagan i espesipiko ira nga equipment anna set tapenu makua i aru ta video tam ira. Angngariganna, napadday i set ira para ta Nehemias: “I Pagayayya Kani Jehova i Sikannu” ta unag na studio ta Mt. Ebo aranni ta Patterson, New York, U.S.A. Nagangngua i wawwaragi ira tu lightweight ira nga materiales nga kagitta lapa na pader ira na Jerusalem tagga. Gafu taw, neyusa ta kapianan i donasion ira ngem i eksena ira ay kagitta na lapa na itchura na nakkapollu ira nga tiempo. Annam nga metro (20 ft) i katannang na kada pader nga napadday ta kayu. Navungunan yatun tu foam anna napintoran tapenu gitta na batu i itchurana. Meyala-ali yaw ira nga “pader” para ta nadduruma nga eksena yayya nga napakarianan i kawagan ira nga set. Ngem maggi $100,000 (U.S.) lapa i nagastu para ta set ira taw nga drama. a

 Mas ngana nga ipappabalo tam i rehional nga kombensiottam taw nga dagun gafu ta nammuattam i karuan ira nga detalye nu kunnasi yaw nga naangngua. Mattattalo ittam nga makedayaw kani Jehova ta interu mundo i ngamin nga nakua para taw nga kombension. Mabbalo ta donasionnu ta interu mundo nga trabahu gukaban na donate.pr418.com anna ta karuan paga.