Ginwang zuphpawng hta madun ai video ni gaw, anhte myit masin hpe hkra ya nna, Chyum Laika sharin ya ai lam ni hpe grau nna chye na shangun ai. Tut Nawng E Kabu Gara Nga Mu”! ngu ai 2020 Ginwang Zuphpawng hta video 114 lawm ai. Uphkang hpung shang hpunau ni hte shanhte hpe karum ya ai hpunau ni htawn ai mungga 43 lawm ai. Dai video ni hpe galaw na matu, gade daram n-gun shadat ra nna gumhpraw gade daram ma ai hpe chye mayu ai kun?

Ndai lamang hpe karum ya na matu, mungkan ting na hpunau nauna 900 daram gaw, shanhte a aten hte n-gun atsam ni hpe sak jaw wa ai. Lamang Yawng a matu lahkawng ning laman, hkying hkum 100,000 daram aten jaw wa ma ai. Dai hta, Nehemia: “Yehowa Hta Kabu Gara Nga Ai Gaw, Nanhte A N-gun Atsam Rai Nga Ai” ngu ai minit 76 na ai sumla hkrung hpe shangut na matu lang wa ai hkying hkum 70,000 mung lawm ai.

Sak jaw nna shawang myit hte karum ya ai ni nga na matu shara, shanhte bungli galaw na matu ra ai jak rai ni, ladat hpaji a matu karum shingtau lam ni, bungli ngut kre na matu ra ai karum shingtau lam ni hpe madi shadaw ya na matu, gumhpraw grai ma wa na hpe nang myit hkrup na re.

“Uphkang Hpung a Sharin Achyin Komiti gaw, anhte a video hta shara amyu myu kaw na htunghking ni hpe grai shalawm mayu ma ai. Hpa majaw nga yang, dai gaw mungkan grup hpunau nauna ni hpe atsawm sha mu lu shangun ai majaw re. Dai hku galaw lu na matu, mungdan 11 kaw na, bungli galaw ai dap 24 gaw ndai bungli hpe arau galaw wa ai. Dai zawn, mungkan grup arau galaw na matu gumhpraw law law ra ai, masing jahkrat ai lam ni, bawng ban jahkrup ai lam ni law law galaw ra ai” ngu Audio/Video dap hte arau bungli galaw ai Jaret Gawtsman tsun dan ai.

Video law malawng a matu, laksan arung arai ni, jak rai ni ra ai. Ga shadawn, Nehemia: “Yehowa Hta Kabu Gara Nga Ai Gaw, Nanhte A N-gun Atsam Rai Nga Ai” ngu ai video hpe galaw na matu, U.S.A Nyu Yawk a Petterson makau hta nga ai Mt. Ebo studio gawk hpe, garam lajang wa ai. Alu gumhpraw ni hpe kaja htum jailang lu hkra, sumla hkrung hpe labau hte maren tup hkrak galaw ai shaloi, hpunau ni gaw moi na Yerusalem mare bunghku ni hte bung hkra galaw wa ai. Hpun pyen hte hkrang shachyaw da ai pe 20 galu ai shakum pa ni hpe nlung hte gaw da ai zawn byin hkra galaw ai. Dai “shakum ni” hpe htawt mai ai, hkrang galai lang mai ai majaw, video a kaga shara ni hta mung ra ai hku garam la nna mai lang ai. Dai pyi naw, ndai sumla hkrung langai sha a matu dola gumhpraw 100,000 daram ma wa ai. *

Ndai ahkri ahkrai lam ni hpe chye lu ai gaw dai ning na gingwang zuphpawng lamang a matu anhte a chyeju dum ai myit hpe grau nna law wa shangun ai. Ndai lamang a matu shang lawm shakut shaja mat wa ai lam ni gaw, mungkan ting Yehowa hpe shakawn sharau ai lam byin shangun na re. donate.pr418.com hte kaga lam ni hku nna mungkan grup bungli a matu, sharawng awng let shang lawm mat wa ai nanhte a alu gumhpraw a matu grai chyeju dum ga ai.