Vitio ila twonawʼa maũmbanonĩ manene ma mĩthenya ĩtatũ, nitũkiitaa ngoo mũno na ikatuma tũelewa Maandĩko nesa. Ũmbano Mũnene wa Mĩthenya Ĩtatũ wa 2020 wa ‘Tanaai Mavinda Onthe’! wĩ na vitio 114, na 43 katĩ wa isu nĩ maũvoo maumĩtwʼe nĩ ana-a-asa ala me Nzamanĩ Ĩla Ĩtongoesye kana atetheesya moo. We waaĩsa kwĩkũlya ngalama ya kũseũvya vitio isu yĩana ata, kana vatũmĩawa masaa meana ata kũiseũvya?

 Ana-a-asa na eĩtu-a-asa vakuvĩ 900 kuma kĩla ngalĩko ĩũlũ wa nthĩ nĩmeeyumisye matũmĩe ĩvinda yoo na ũtũĩka woo kũtetheesya kũseũvya vitio sya ũmbano wa mwaka ũũ. Kwa ũkuvĩ, matũmĩie masaa ta 100,000 na myaka mbee wa ĩlĩ. Masaa 70,000 katĩ wa asu matũmĩiwe kũseũvya ĩla ndulama ya ndatĩka 76 yĩ na kyongo, Neemia: “Ũtanu wa Yeova Nĩ Vinya Wenyu.”

 Vate nzika, nĩvendekaa mbesa mbingĩ nĩ kana ala meyumĩtye kũthũkũmĩa vitio isu meanĩĩwʼe mavata moo ma lasima, vamanthwe mĩio ya wĩa, na vala vekwosewa vitio vaiseũvwʼa nesa.

 Mwana-a-asa ũthũkũmaa Mũvĩanĩ wa Kũlekoti Vitio na Syĩndũ sya Kwĩthukĩĩsya wĩtawa Jared Gossman easya ũũ: “Kamitii ya Ũmanyĩsya ya Nzama Ĩla Ĩtongoesye nĩyendete kũĩkĩĩthya kana vitionĩ nĩvoonanwʼa kũndũ kwĩ kĩvathũkanyʼo na andũ ma syĩthĩo syĩ kĩvathũkanyʼo. Kĩu kĩtetheeasya andũ kwona nesa kana twĩ na ana-a-asa kĩla vandũ ĩũlũ wa nthĩ. Nũndũ wa ũu, nĩvavangĩthiwʼe timũ 24 nthĩnĩ wa nthĩ 11 itetheesye wĩanĩ ũũ. Wĩa ta ũsu ũũtethwʼa nĩ andũ me nthĩ syĩ kĩvathũkanyʼo wendaa mbesa mbingĩ, mĩvango mĩseo, na no nginya andũ makwatĩanĩe nesa.”

 Vitio mbingĩ katĩ wa ila tũseũvasya syendaa mĩio ya mwanya, na no nginya syosewe vandũ vaseũvĩtwʼe na ũtũĩka mũnene. Kwa ngelekanyʼo, nĩ kana ndulama ya Neemia: “Ũtanu wa Yeova Nĩ Vinya Wenyu” yoswe, ana-a-asa maseũvisye syĩndũ ila ikũtũmĩwa ndulamanĩ ĩsu na masyamba ĩsũmbanĩ yitũ ya kwosea vitio yĩtawa Mt. Ebo, yĩla yĩ vakuvĩ na Patterson, kĩsionĩ kya New York, Amelika. Na nũndũ nĩmendaa kũtũmĩa mĩvothi nesa na maiĩkĩĩthya ndulama nĩyaumĩla ĩilye ũndũ ĩvinda ya tene kwailye, maakie syĩndũ itonya kũkuĩka na maiseũvya syekala ngũta sya ndũa ya Yelusaleme. Kĩla kĩmwe kya syĩndũ isu kyaĩ na ũasa wa mita thanthatũ (vuti 20). Kyaĩ kya mbwaũ ikwatanĩtwʼe na ikavuvwa kĩndũ kĩsyokete kĩkavakwa langi, ũkethĩa wasisya wĩona ta mavia. Syĩndũ isu iilye ngũta syaĩ itonya kũsongwʼa na iyambĩlwa vala mekwenda kwosela vitio. Nũndũ wa ũu, mayaĩ na vata wa kũseũvya mbingĩ mũno. Ĩndĩ o na vailye ũu, ndola 100,000 (U.S.) syatheleile syĩndũnĩ isu sya ndulama ya Neemia. a

 Kũmanya maũndũ asu onthe no kũtũtetheesye tũtũnge mũvea mũno nũndũ wa ũmbano mũnene wa mĩthenya ĩtatũ wa mwaka ũũ. Nĩtwĩsĩ nesa kana kĩthito kĩla ana-a-asa na eĩtu-a-asa meekĩie nĩ kana ũmbano ũsu waĩle, nĩkĩũtuma andũ nthĩ yonthe mamũtaĩa Yeova mũno. Nĩ mũvea mũno nũndũ wa mĩvothi ĩla umasya kwondũ wa wĩa wa nthĩ yonthe, wĩthĩwe umasya kwĩsĩla donate.pr418.com, kana ũtũmĩaa nzĩa ĩngĩ.