Kes vídiu di nos kongrésus ta toka nos korason i es ta djuda-nu ntende midjór kes kuza ki Bíblia ta inxina. Na kongrésu di 2020 ku téma ‘Sta sénpri kontenti!’, fazedu 114 vídiu i kes irmon di Grupu Enkaregadu di Óbra ku ses ajudanti faze 43 diskursu. Bu krê sabe kantu dinheru ki gastadu i tudu trabadju ki staba nvolvidu na faze kes vídiu?

 Pa faze kes vídiu, uns 900 irmon na mundu interu oferese ses ajuda, ses ténpu i ses kapasidadi. Pa tudu, es gasta kuazi 100 mil óra, duránti más di dôs anu na kel prujétu. Kel-li ta inklui 70 mil óra di trabadju sô pa faze kel vídiu prinsipal di 76 minutu ku téma: Neemias: ‘Alegria ki ta ben di Jeová é nos fortaléza.’

 Sima talvês bu ta imajina, gastadu txeu dinheru pa kuida di nisisidadis di kes algen ki oferese pa djuda i pa da-s tudu kes material, ekipamentu i lugar ki es mesteba pa faze ses trabadju.

 Irmon Jared Gossman, ki ta trabadja na Dipartamentu di Sirvisu di Son i Vídiu, fla: “Kumison di Ensinu di Grupu Enkaregadu di Óbra krê pa nos vídiu mostra kultura i lugaris diferenti, dja ki nos irmons sta spadjadu na mundu interu. Pa konsigi faze kel-li, 24 ekipa di 11 país diferenti trabadja djuntu na kel prujétu li. Nu mesteba txeu dinheru, planu i organizason pa nu konsigi tinha irmons di mundu interu ta trabadja djuntu.”

 Txeu di kes vídiu ki nu ta faze meste di ekipamentu sértu i pa nu konpo lugar pa faze sénas diferenti. Pur izénplu, kes lugar ki konpodu pa drama Neemias: ‘Alegria ki ta ben di Jeová é nos fortaléza’, fazedu déntu di stúdiu di Monti Ebo, pértu di Patterson, na Nova York, na Mérka. Es tinha ki fazeba kes séna di vídiu ku paredis sima kes di Jiruzalen na ténpu antigu. Má tanbê irmons krê uzaba kes kontribuison di midjór manera. Pur isu, es faze pésas di madera ki tinha 6 métru di altura, es kubri-s ku esferovite ô pon di ratu i es pinta-s di manera ki ta parseba ku pédra. Kes “paredi” ka éra fíksu i ta da pa uzaba es na txeu séna. Má simé, gastadu kuazi 100 mil dóla (kuazi 10 mil kontu) sô pa priparaba kes lugar ki uzadu pa faze kes séna di kel vídiu prinsipal. a

 Gósi ki dja nu sabe modi ki fazedu kongrésu di es anu, nu ta xinti más gratidon inda pa kel prugrama di kongrésu. Nu ten sertéza ma tudu trabadju ki fazedu na es kongrésu ta traze txeu lovor pa Jeová na mundu interu. Obrigadu pa kontribuisons ki nhos ta faze di korason pa trabadju na mundu interu através di site donate.pr418.com i di otus manera.