Bavideo ya balukutakanu na beto ya distrike ke simbaka kibeni ntima na beto mpi yo ke sadisaka beto na kubakisa mbote malongi ya Biblia. Lukutakanu ya distrike ya 2020 ya kele ti ntu-diambu “Beno Vanda Ntangu Yonso na Kiese”! kele ti bavideo 114. Na kati na yo, beto kele ti badiskure 43 yina bampangi ya Nto-Kimvuka mpi bansadisi na bo me sala. Keti nge me kudiyula mambu yina yo lombaka nde bampangi kusala mpi mbongo ikwa me basika sambu na kusala yo?

 Bampangi na beto ya babakala mpi ya bankento kiteso ya 900 na ntoto ya mvimba pesaka ntangu na bo mpi sadilaka mayele na bo sambu na kusala manaka yai. Na kimvuka, kisalu yai lombaka nde bampangi kulutisa bangunga kiteso ya 100 000. Bangunga yai bo me sala me fwanana ti bamvula zole ya kisalu. Na bangunga yango 100 000, bo salaka bangunga 70 000 sambu na kusala drame ya minuta 76 yina kele ti ntu-diambu Nehemia: “Kiese ya Yehowa Kele Kisika na Beno ya Ngolo ya Lutaninu.”

 Ya kieleka, kisalu yai yonso lombaka mbongo mingi: yo lombaka kudisa bampangi yina kudipesaka na luzolo yonso, kusosila bo bisika ya kulala mpi bisadilu, bisika ya kusala drame yango mpi baapareyi ya kusadila.

 Mpangi Gossman Jared ke sadilaka Yehowa na luzolo yonso na departema ya Audio/Video. Yandi ke tuba nde: “Komite Sambu na Kulonga ya Nto-Kimvuka ke zolaka kibeni nde bavideo na beto kumonisa bansi mingi mpi mutindu bantu ya bisika mingi ke zingaka. Bo ke zolaka nde mambu kusalama mutindu yina sambu na kumonisa nde dibuta na beto kele na ntoto ya mvimba. Sambu mambu kusalama mutindu yina, bimvuka ya bampangi 24 na bansi 11 salaka na bumosi sambu na kusala kisalu yai. Sambu bampangi yai ya kele na babwala ya mutindu na mutindu kusala na bumosi, yo lombaka mbongo mingi, kuyidika mambu mbote mpi kutwadisa yo mbote.”

 Sambu na kusala bavideo mingi ya beto talaka, yo lombaka kusosa bisika ya kusala yo mpi bima ya nkaka ya fioti-fioti ya beto ke sadilaka ve mpamba-mpamba. Mu mbandu, sambu na kusala drame ya Nehemia, bo yidikaka bisika na stidio ya Mount Ebo, pene-pene ya Patterson na New York. Bampangi zolaka nde drame yai kumonisa kibeni mutindu babwala vandaka na ntangu ya Nehemia mpi yo monisa mambu ya kieleka. Bo vandaka mpi kuzola nde beto sadila mbote makabu yina bampangi ke pesaka. Yo yina bo salaka bima ya fioti-fioti ya bo lenda sadila sambu na kumonisa mutindu bibaka ya Yeruzalemi vandaka na ntangu ya ntama. Bo salaka bibaka ya mabaya yina vandaka nda bametre sambanu katuka na ntoto tii na zulu. Bo tulaka yo muse, ebuna na zulu bo pakulaka yo kulere sambu yo monana bonso matadi. Bo lendaka kukatula bibaka yina kukonda mpasi mpi kusadila yo na bitini mingi ya nkaka ya drame. Yo salaka nde bima ya bo ke tulaka sambu na kuyidika kisika mosi buna (décor) kuvanda ve mingi. Ata mpidina, yo lombaka mbongo kiteso ya badolare 100 000 sambu na kusala bima ya kuyidikila kisika yina bo salaka drame yai. a

 Mambu yai yonso ya beto me zaba ke sala nde beto monisa diaka ntonda ya mingi na mutindu bo yidikaka lukutakanu ya distrike ya mvula yai. Beto ke ndima kibeni nde bikesa yina bampangi salaka sambu na kuyidika lukutakanu yai ya distrike ta pusa bantu ya ntoto ya mvimba na kutonda Yehowa mpi na kukumisa yandi na bumosi. Matondo mingi sambu na makabu ya beno ke pesaka na luzolo yonso na nzila ya Internet na donate.pr418.com mpi na mutindu ya nkaka.