Mi vidueila naŋ tofa o bɔŋaŋnda naala bɛndaŋ ndo la pilaŋ naa kɔllo tau. Nduyɛ mi la mala naa miŋ chɔɔlu sina pɛŋgoo sɔla o Diom Mɛlɛkaa niŋ. Bɔŋaŋ Bɛndoo le Wɔsi 2020 “La Wa a Kɔl Kɛndɛ Pɛŋgu o Pɛŋgu”!, ndoo nɔ vidueilaŋ 114 a sɔɔŋ 43. Dialii Kuumbaŋ Choo Ve a wanaa ndaa malaa ndaa yɔŋgu sɔɔŋ muŋ ni. A yiyaŋ niŋ pa a teleŋ nda chua le vidueilaŋ ndaŋ toosiaa wo vɛlɛ a nyɛsɔlaa nda pisi wo?

 Chieeŋndo balɔɔ silɔ, puaapiliaa a ndepiliaa ndaa yɔŋguŋ le wallo hoo tosaa wa ndaa wa le 900. O wɔsilaŋ la tiɔɔŋ bɛŋgu nda tosa wallo hoo ni. Nduyɛ teleŋ nda chua le ndu chiiyo wo wa le hawɛilaŋ 100,000. O laŋ tɛɛŋ, a chua hawɛilaŋ 70,000 le viduei chemchemma 76 hoo toosiaa, Nɛhimaya: ‘Kɔl Kɛndɛ Chɛhowa Ke Nya Wo, Ndu Cho Yoomuma Nyaaŋ Ni.’

 A mɛɛ nyapila sina yɛ, nyɛsɔlaa pila ndoo yeemaŋ ni le wanaa yɔŋguŋ haa a kɔl ndaa kpou le wallo hoo wa nyɛm nda hauba woŋ kioo. Mi nyɛsɔlaa pisiŋ vɛlɛ tau le nyɛm walloŋ piondɔɔ a fondaa bɛɛndiaa le vidueilaŋ ndaŋ toosiaa.

 Mi Jared Gossman, o cho wallo a Kunda Toosiaa Vidueilaŋ Ndo dimi aa: “Kunda Pɛɛkaa o Dialii Kuumbaŋ Choo Ve niŋ yeema bɔɔ miŋ wa chɔɔ naamulaŋ a fondaŋnda yɛyɛlaŋ o vidueila naalaŋ niŋ. Hei mala naa miŋ che mɛɛ chaaŋaa naa laalaŋaa cho chieeŋndo balɔɔ silɔ wa cho yɛ. Le batiuwaa hoo sɔlaa, kundala cho le vidueilaŋ toosiaa wo 24 o lɛŋnde 11 niŋ tosa wallo diompilɛ ni. Le wali bɛndu waa ndoo tosaa chieeŋndo balɔɔ silɔ, naŋ yeema nyɛsɔlaa, miŋ kɛɛsiaa sɔɔŋ nduyɛ miŋ chaa muŋ kɔɔna.”

 Le vidueila naala bɔɔbɔɔ toosiaa, mɛɛ miŋ soliŋ nyɛm waliŋ teŋgeŋndoŋ kpeku nduyɛ miŋ taŋgul nyɔɔŋ ŋpum. Le tamaseliiyo, le vidueiyo hoo solioo Nɛhimaya: ‘Kɔl Kɛndɛ Chɛhowa Ke Nya Wo, Ndu Cho Yoomuma Nyaaŋ Ni’, ma taŋgul nyɛm yeemaŋ ndoŋ o chiɛi laviduei cho o Pembei Ibo wo niŋ. Patasiŋ ikɛi chiɛiyo hoo cho ni o Niu Yɔk niŋ Amɛlika. Puaapiliaa ndaa yeema ma soliŋ toolula waŋnda yɔŋgu laŋ kpeku nyɛkɛndɛi nduyɛ ma toosiaa vidueiyo hoo mɛɛ mɛɛ sɔɔŋ wa sindɛ yɛ. Le hei, ma soliŋ pɛŋgɛŋ fefeloŋ kpeku le kpakioo Chulusalɛm taŋgullo. A buŋgaŋ nda toosiaa pɛŋgɔŋ muŋ ni. Nduyɛ i kɛ kɛ wa bandei le mɛtɛlɛlaŋ la ŋɔmpum ɔɔ nɛiyo 20. Mɛɛ nda chii muŋ toosiaa, ma hol nyɛ cheleŋ lechoo. Okoŋ, ma yikpa muŋ naŋ chaa a pouwo nda taŋgul kpaki kalaa ni. Ndaa nɔla ma faŋa kpaki nda toosiaa hoo a pɛŋgɔŋ ndo ma yɛɛ ndu lachi, le chɔmndo fondaŋ nda teŋgeŋ teŋgeŋndaŋ o vidueiyo niŋ. Mɛɛ o hei niŋ, a toosiaa lɛ laŋ mɛɛ kpɛ laa yeemaŋ yɛ le. Kɛ a koŋ kpou, nyɛsɔlaa pisiŋ le vidueiyo hoo ndupilɛ kpe wo o wa le kaniŋ mapuuloŋ dalalaŋ 100,000. a

 Sɔɔŋ muŋ kpou sinaa mala naa le miŋ chɔɔlu balika melaa nɔ le bɔŋaŋ naa bɛndoo naŋndee. Ŋ nɔ tiindaŋndo maa wali tosaŋ le bɔŋaŋndo hoo toosiaa wo cho tosa mi Chɛhowa sɔla saŋgalaa o chieeŋndo choo kpou. La nuwali tau le toolula nyalaŋ yɔŋgoo a kɔllo kpou o donate.pr418.com a o nɛila cheleŋ niŋ.