ပတၢ်အိၣ်ဖှိၣ်ဖးဒိၣ်​ အတၢ်ဂီၤမူတဖၣ်န့ၣ်​ ထုးန့ၢ်ပသး ဒီးမၤစၢၤပှၤလၢ ပကနၢ်ပၢၢ်အါထီၣ်​ လံာ်စီဆှံ အတၢ်သိၣ်လိတဖၣ်လီၤ. ၂၀၂၀ တၢ်အိၣ်ဖှိၣ်ဖးဒိၣ်​ “သးခုတဘိယူၢ်ဃီတက့ၢ်” အတၢ်ရဲၣ်တၢ်ကျဲၤအပူၤန့ၣ်​ တၢ်ဂီၤမူအိၣ်ဝဲ ၁၁၄ ခါလီၤ. တၢ်စံၣ်တဲၤတဲလီၤတၢ် ပၣ်ဃုာ်ဝဲ ၄၃ ခါလၢ ပှၤပၢဆှၢတၢ်ကမံးတံာ် ဒီးအပှၤမၤစၢၤတၢ်တဖၣ်ဟ့ၣ်ဝဲန့ၣ်လီၤ. တၢ်မၤတဖၣ်အံၤဘၣ်တၢ်မၤအီၤဒ်လဲၣ်, လၢတၢ်ဂီၤမူတဖၣ်အဂီၢ် တၢ်လၢာ်ဘူၣ်လၢာ်စ့ၤ ကအိၣ်ထဲလဲၣ်န့ၣ်​ မ့ၢ်နဆိကမိၣ်ဘၣ်​ တဘျီဘျီဧါ.

 ဒ်သိးတၢ်ရဲၣ်တၢ်ကျဲၤအံၤ ကကဲထီၣ်လိၣ်ထီၣ်အဂီၢ် ပဒီပုၢ်ဝဲၢ်မုၣ်​ ဒီပုၢ်ဝဲၢ်ခွါအဂၤ ၉၀၀ ဃၣ်ဃၣ်လၢ ဟီၣ်ခိၣ်ဒီဘ့ၣ်န့ၣ်​ ဘၣ်ဟ့ၣ်လီၤအတၢ်ဆၢကတီၢ်ဒီး တၢ်သ့တၢ်ဘၣ်တဖၣ်လီၤ. လၢခံနံၣ်ဘျဲၣ်အတီၢ်ပူၤ အဝဲသ့ၣ်ဘၣ်ဟ့ၣ်လီၤ အတၢ်ဆၢကတီၢ် အနၣ်ရံၣ်​ ၁၀၀,၀၀၀ ဃၣ်ဃၣ်လၢတၢ်မၤအံၤအဂီၢ်လီၤ. တၢ်သ့ၣ်တဖၣ်န့ၣ်အကျါ ပၣ်ဃုာ်ဒီး လံာ်စီဆှံ တၢ်ဂဲၤဒိပူ စီၤနဃ့မယၤအပူ- “ယွၤအတၢ်သူၣ်ခုသးခုန့ၣ်​ မ့ၢ်သုဂံၢ်သုဘါလီၤ” လၢအယံာ်ဝဲ ၇၆ မံးနံး ဒီးတၢ်ဂီၤမူအံၤ ကဝံၤဝဲအဂီၢ် ပှၤဘၣ်ဟ့ၣ်တၢ်ဆၢကတီၢ် အနၣ်ရံၣ်​ ၇၀,၀၀၀ ညါလီၤ.

 ဒီးဒ်သိးတၢ်မၤကကဲထီၣ်လိၣ်ထီၣ်အဂီၢ် ပကဘၣ်ကွၢ်ထွဲ ပှၤမၤစၢၤတၢ်ဖိလၢ အဟ့ၣ်လီၤအသးတဖၣ်​ အတၢ်လိၣ်ဘၣ်, တၢ်ပီးတၢ်လီလၢ အလိၣ်ဘၣ်ဝဲတဖၣ်​ ဒီးပဘၣ်ရဲၣ်ကျဲၤန့ၢ် တၢ်လီၢ်လၢ အဝဲသ့ၣ်​ ကအိၣ်ဝဲအဂီၢ်အဃိ တၢ်လၢာ်ဘူၣ်လၢာ်စ့ၤအိၣ်အါမးန့ၣ်​ သုတယာ်ကွၢ်သ့ဝဲလီၤ.

 ကၠဲရဲၣ်​ ကိမၢ လၢအမၤသကိးတၢ်ဒီး တၢ်ကလုၢ်ဒီးတၢ်ဂီၤမူဝဲၤကျိၤန့ၣ်​ တဲဝဲလၢ “တၢ်သိၣ်လိနဲၣ်လိ ကမံးတံာ်လၢ အမၤသကိးတၢ်ဒီး ပှၤပၢဆှၢတၢ်ကမံးတံာ်န့ၣ်​ အဲၣ်ဒိးဒုးနဲၣ်ဖျါထီၣ်ဝဲ တၢ်လီၢ်အါတီၤ ဒီးတၢ်ဆဲးတၢ်လၤအါမံၤလၢ တၢ်ဂီၤမူတဖၣ်အပူၤန့ၣ်လီၤ. မ့ၢ်လၢပဒီပုၢ်ဝဲၢ်တဖၣ်​ အိၣ်လၢဟီၣ်ခိၣ်ဒီဘ့ၣ်​ ဒီးပအဲၣ်ဒိး ပာ်ဖျါထီၣ်လၢ တၢ်ဂီၤမူအပူၤအဃိလီၤ. ဒ်သိးပမၤဒ်န့ၣ်​ ကသ့အဂီၢ်ပှၤ ၂၄ ဖု လၢအိၣ်လၢထံကီၢ်လီၤဆီလိာ်သးအပူၤန့ၣ်​ ဘၣ်မၤသကိးတၢ်လၢ တၢ်မၤအံၤအဂီၢ်လီၤ. အဃိ ပှၤမၤသကိးတၢ်လၢ တၢ်လီၢ်လီၤဆီလိာ်သးကန့ၢ်အဂီၢ် ပှၤဘၣ်ကတဲာ်ကတီၤတၢ်, ရဲၣ်ကျဲၤတၢ် ဒီးတၢ်လၢာ်ဘူၣ်လၢာ်စ့ၤအိၣ်ဝဲအါမးလီၤ.”

 ပတၢ်ဂီၤမူ အါတက့ၢ်အဂီၢ် ပလိၣ်ဘၣ်​ တၢ်ပီးတၢ်လီလၢအဂ့ၤဒီး တၢ်လီၢ်တၢ်ကျဲန့ၣ်လီၤ. အဒိ စီၤနဃ့မယၤအပူ- “ယွၤအတၢ်သူၣ်ခုသးခုန့ၣ်​ မ့ၢ်သုဂံၢ်သုဘါလီၤ.” န့ၣ်​ ပှၤဒိအီၤဖဲ မီး အံဘိၤ လၢအဘူးဒီး ဖဲထစၢၤ, နူယီး, U.S.A အပူၤလီၤ. ဒ်သိးတၢ်အိၣ်သး ကဖျါလီၤဂာ် လီၤတံၢ်လီၤဆဲး ဒီးတကတီၢ်ဃီန့ၣ်​ ပသူတၢ်မၤဘူၣ်လၢ တၢ်ကူၣ်သ့အပူၤကသ့အဂီၢ် ဒီပုၢ်ဝဲၢ်သ့ၣ်တဖၣ်​ ဘၣ်တ့ထီၣ်ဘှီထီၣ်ဝဲ ဂီၤပၤဖှံဖှံဖိတဖၣ်​ ဒ်သိးဖျါကလီၤဂာ်ဒီး ဝ့ၢ်ယရူၤၡလ့ၣ်​ အဝ့ၢ်ခိၣ်ဒူလၢပျၢၤအဂီၢ်လီၤ. ဂီၤပၤတခါစုာ်စုာ်န့ၣ်​ အကစီၤထီဝဲ ၆ မံထၢၣ်​ (ပ့ၣ်​ ၂၀) ဒီးပှၤတ့အီၤလၢ ဖီးဘ့ၣ်, ကွီၤအီၤလၢသ့ၣ်​ ဒီးပှၤဖှူအီၤဒ်သိး ကလီၤဂာ်လၢလၢၢ်အဂီၢ်လီၤ. “ဂီၤပၤ” တဖၣ်န့ၣ်​ ပှၤသုးအီၤ ဒ်သိးပှၤကသူအီၤလၢ တၢ်လီၢ်အဂၤအဂီၢ်သ့အဃိ တလိၣ်ပှၤမၤအါထီၣ်အီၤဘၣ်. သနာ်က့ ထဲဒၣ်​ တၢ်လီၢ်လၢတၢ်ဂဲၤဒိပူ တခါအံၤအဂီၢ်န့ၣ်​ စ့လိၣ်ဝဲ ၁၀၀,၀၀၀ ဒီလၣ်​ ဃၣ်ဃၣ်ညါလီၤ. a

 ပမ့ၢ်သ့ၣ်ညါ တၢ်ဂ့ၢ်အံၤလီၤတံၤလီၤဆဲးန့ၣ်​ ပတၢ်စံးဘျုးစံးဖှိၣ်လၢ တၢ်အိၣ်ဖှိၣ်ဖးဒိၣ်အဂီၢ် ကဒိၣ်ထီၣ်အါထီၣ်ဝဲလီၤ. ပနာ်သပှၢ်တၢၢ်လၢ တၢ်ဂုာ်ကျဲးစၢးလၢ တၢ်ရဲၣ်တၢ်ကျဲၤအံၤအဂီၢ်န့ၣ်​ ကကဲထီၣ်​ တၢ်စံးထီၣ်ပတြၢၤ ယဟိဝၤယွၤ လၢဟီၣ်ခိၣ်ဒီဘ့ၣ်ညါလီၤ. ပစံးဘျုးဘၣ်​ သုဝဲဒီပုၢ်ဝဲၢ်မုၣ်​ ဒီပုၢ်ဝဲၢ်ခွါတဖၣ်လၢ သုဟ့ၣ်လီၤတၢ်မၤဘူၣ်လၢ donate.pr418.com ဒီးလၢကျဲအဂၤတဖၣ်အဃိန့ၣ်လီၤ.