Mavidio alubuhanga kwa mikopano yaluna yemituna alufitanga kwa pilu luli mi alutusanga kuutwisisa hande zeiluta Bibele. Fa Mukopano Omutuna wa 2020 wa “Mube Babatabile Kamita”!, kulukisizwe mavidio a 114, hamohocwalo ni lingambolo ze 43 zefilwe ki mizwale ba mwa Sitopa Sesietelela ni batusi babona. Kana mwatabela kuziba musebezi kaufela oeziwanga ni masheleñi atokwahalanga kuli musebezi wa kulukisa mavidio ukonde?

 Mizwale ni likaizeli baluna babazwa mwa linaha zeshutana-shutana bababato eza 900, nebaitombozi nako yabona ni kuitusisa buikoneli bwabona kuli batuse kulukisa mavidio a mukopano. Nebatandile lihora zebato eza 100,000, mi musebezi kaufela neungile lilimo zepeli. Taba yeo ikopanyeleza ni lihora ze 70,000 zene batandile kuli balukise drama yetomile fa litaba za mwa Bibele ya mizuzu ye 76 ya Nehemia: “Tabo Yafa Jehova Yamisileleza.”

 Nekutokwahala masheleñi amañata kuli baitateli babanani buitomboli bao bakone kubabalelwa kwa mubili, babe ni lisebeliso zenetokwahala, hamohocwalo ni lika za kuitusisa kwa kuyaha miyaho yenetokwahala kuli musebezi wo ukonde.

 Muzwale Jared Gossman, yaswalisana ni Liluko Lelitalima za Mulumo ni Mavidio naabulezi kuli: “Ba Katengo ka Tuto ka Sitopa Sesietelela babata kuli mwa mavidio aluna kuboniswange batu babashutana-shutana ni libaka zeshutana-shutana. Libaka kikuli mizwale baluna bafumaneha mwa lifasi kaufela mi lubata kuli taba yeo ibonahale ni mwa mavidio aluna. Kacwalo, likwata ze 24 za mizwale ni likaizeli babazwa mwa linaha ze 11, nelisebelisani hamoho kulukisa mavidio a mukopano. Mi nekutokwahala masheleñi amañata kuli lukone kulukisa ni kuonga-onga musebezi wa mizwale ni likaizeli bao babazwa mwa linaha zeshutana-shutana.”

 Hañata, kulukisa mavidio aluna kutokwanga kuli lusebelise liitusiso zeipitezi ni libaka zeswanela. Ka mutala, libaka zebonisizwe mwa drama ya Nehemia: “Tabo Yafa Jehova Yamisileleza,” neliyahezwi mwa situdiyo yefumaneha kwa Mt. Ebo, bukaufi ni muleneñi wa Patterson, mwa New York, kwa America. Mizwale hane balukisa vidio yeo, nebaezize mone bakonela kaufela kuitusisa hande masheleñi a kopano, mi nebaboni teñi kuli litaba zakale zebonisizwe mwateñi linepahalile. Nebayahile miyaho ka kuitusisa lika zebubebe, kono ili ka kulikanyisa mone abonahalelanga mamota a mwa Jerusalema wa kwaikale. Muyaho ni muyaho neuezizwe fa kota mi neli wa limita ze 6 kuya mwahalimu, ili one ukwahezwi ka sofa, mi neubasizwe hande kuli ubonahale inge kuli ki wa sitina. Mamota ao naakona kushimbululelwa mwa libaka zeshutana-shutana, mi kueza cwalo nekutusize kuli kusike kwalukiswa mamota acwalo amañata-ñata. Nihakulicwalo, nekutokwahala masheleñi abato eza K1,855,000 kuli kuyahiwe miyaho yenetokwahala mwa drama ye inosi. a

 Kuziba litaba ze kulutusa kuitebuha hahulu mukopano omutuna wa silimo se. Lunani buikolwiso bwa kuli musebezi kaufela oezizwe wa kulukisa mukopano wo ukatahisa tumbo ku Jehova mwa lifasi kaufela. Lwaitumela hahulu kwa linubu zamina zemusweli kufa kuli lituse mwa musebezi wa mwa lifasi kaufela ka kuitusisa donate.pr418.com kamba linzila zeñwi.