Vidio minyiso e chokruogewa madongo mag ndalo adek jiwowaga ahinya kendo gikonyowa winjo tiend puonj manie Ndiko e yo maber moloyo. Chokruok maduong’ ma higa mar 2020 nigi vidio 114 moriwo nyaka twege 43 migolo gi owete manie Bura Matayo kod jokonygi. Be isegapenjorie ni to loso vidiogo dwaroga kinda ma chal nade kod pesa ma romo nade?

 Owetewa gi nyiminewa ma kwan-gi hawo 900 ma a kuonde mopogore opogore e piny ngima nochiwo thuologi kod lony margi mondo gikony e loso vidiogo. Ne gitiyo gi seche ma dwa romo 100,000 koriw, kuom higni ariyo. Mano oriwo seche 70,000 ma notigo e loso drama ma kawo dakika 76 ma wiye wacho ni Nehemia: “Mor mar Jehova e Tekou.”

 Mondo joma ochiworego oyud kuonde dak kod gik mamoko mochuno e ngima sama gidhi nyime gi migawono, gibed gi gige tich moromo, kaachiel gi kuonde mowinjore gi loso vidiogo, ne nyaka ti gi pesa mang’eny ahinya.

 Jared Gossman manie migawo mar Audio/Video Services (ma loso vidio kod weche momak miwinjo) wacho kama: “Komiti mar Puonjo manie bwo Bura Matayo temo ahinya mondo vidiowa onyis ogendni mopogore opogore ma a e pinje mopogore opogore. Mano konyo e nyiso maler ni riwruokwa okwako piny ngima. Kuom mano, grube 24 ma loso vidio e pinje 11 nokonyo e loso vidio mag chokruok maduong’. Timo mago duto dwaro pesa mang’eny, chenro maber, kod tudruok mong’ith.”

 Loso thoth vidiowa dwaroga gige tich ma ni e rang’iny ma malo ahinya kaachiel gi gik mitiyogo e loso kuonde mimakoe vidio. Kuom ranyisi, kuonde ma nidhi makie drama mar Nehemia: “Mor mar Jehova e Tekou” ne olos e i studio ma Mt. Ebo ma ni machiegni gi Patterson, New York, Amerka. Mondo ne ti maber gi chiwo ma wagolo, to e sechego bende olos dramano e yo ma nyiso gadier kaka gik moko ne chalo e kinde Nehemia, owete notiyo gi bod mayot e loso sisi (kor ot) ma chalo gi ohinga mag Jerusalem machon. Moro ka moro kuom sisi ma nolosgo ne nigi bor ma romo mita 6 (kata fut 20) nowirgi gi rangi moro makende ma miyo ginenore ka gima olosgi gi kidi. Sisigo ne inyalo chor mayot mondo ti kodgi nyading’eny sama imako kidienje (scenes) mopogore opogore mag dramano, to mano nokonyo e dwoko piny kwan mag gik ma nitiyogo e loso dramano. To e ma pod loso dramano kende ne dwaro chiegni dola 100,000 ma Amerka (siling’ milion 10 ma Kenya). a

 Ng’eyo weche ma walerogo duto miyo wakawo mapek ahinya chokruok maduong’ ma higani. Wan gadier ni kinda duto motim e loso chokruok maduong’ ma higani biro kelo ne nying Jehova pak e piny ngima. Wagoyoni erokamano ahinya kuom chiwo migolo misirogo tij piny mangima kokalo websaitwa mar donate.pr418.com kod yore mamoko.