Aqeju video in che etz toj nimaq chmabʼil te oxe qʼij in che kuʼpin toj qanmi ex in che onin qiʼj tuʼn telxix qnikʼ tiʼj Tyol Dios. I etz 114 video toj nimaq chmabʼil te oxe qʼij «¡Kukx che tzalaje!» te 2020, ex kyxol 114 video lu, at 43 chikʼbʼabʼil kye qeju at kyoklen toj Kʼloj Xjal Qʼil Twitz Aqʼuntl ex qeju onil kye. ¿Jniʼ aqʼuntl ex jteʼ pwaq in kubʼaj tuʼn kybʼant qe video lu?

 Chʼixmi 900 erman e aqʼunan ex el kypaʼn ambʼil tuʼn tetz programa te nimaq chmabʼil. Kabʼe abʼqʼi xi tiʼn tuʼn tbʼant aqʼuntl lu ex ok qʼet chʼixmi 100 mil or tiʼj. Kyiʼj or lu, 70 mil or ok qʼet tuʼn tetz video te 76 minut aju tok tbʼi, Nehemías: Aju tzalajbʼil tuʼn Jehová in tqʼoʼn qipumal.

 Ax ikx, xi tiʼn nim pwaq tuʼn kyok xqʼuqit qe onil, tuʼn kybʼaj bʼinchet junjun muro ex tuʼn kytzaj laqʼet junjun equipo.

 Tzaj tqʼamaʼn Jared Gossman, aju in najbʼen toj Kʼloj onil tiʼj Audio ex Video qa «taj Kʼloj Ximel Xnaqʼtzbʼil te Kʼloj Xjal Qʼil Twitz Aqʼuntl tuʼn kyetz junxichaq xjal, tnam ex lugar kyoj video. Iktzun tten jaku tzʼel kynikʼ erman qa ateʼqe txqantl qerman twitz tkyaqil Txʼotxʼ. Tuʼntzunju, e aqʼunan 24 equipo te 11 tnam. Ex tuʼn kyaqʼunan junx, iltoq tiʼj tuʼn tajbʼen nim pwaq ex tuʼn tbʼaj kyximen tzeʼn kbʼantel aqʼuntl».

 I etz nim video, pero tuʼn kybʼant junjun iltoq tiʼj tuʼn kyajbʼen tbʼanel equipo ex tuʼn kybʼaj adornarit nim tiʼchaq. Jun techel, tuʼn tbʼant video Nehemías: Aju tzalajbʼil tuʼn Jehová in tqʼoʼn qipumal e kubʼ bʼinchet junjun tiʼchaq tojxi estudio te Mount Ebo, aju at nqayin tiʼj Patterson (Nueva York). Tuʼn tajbʼen pwaq te onbʼil toj tumel ex tuʼn kukx tetz yekʼin qe tiʼchaq axix tok toj video, jaw kybʼinchaʼn erman junjun muro nyaxix alqe ex ik che keʼyin ik tzeʼn ojtxe tnam Jerusalén. Teyele junjun plaj muro, attoq 6 metro tweʼ, e ajbʼen tzʼlam tuʼn kybʼaj bʼinchet ex ajbʼen jun material tuʼn kyok bʼinchet tilbʼilal abʼj tiʼj. Jakutoq che ajbʼen qe muro lu toj junjuntl plaj tuʼntzun miʼn kyjaw bʼinchet txqantl muro aj kyel grabarin junjuntl plaj video. Maske ok tilil tuʼn miʼn tbʼaj najset nim pwaq, noqtzun tuʼnj, kubʼaj chʼixmi 100 mil dólar kyiʼj qe tiʼchaq lu. a

 Tkyaqil tqanil lu in nonin qiʼj tuʼn tok qqʼoʼn mas toklen nimaq chmabʼil te oxe qʼij aju kʼeletz toj abʼqʼi lu. Qʼuqli qkʼuʼje tiʼj qa tkyaqilju aqʼuntl ok tiʼj nimaq chmabʼil lu, kʼonil tuʼn tjaw nimset Jehová twitz tkyaqil Txʼotxʼ. Chjonte tuʼnju pwaq te onbʼil in tzaj kyqʼoʼne tiʼj aqʼuntl in bʼant twitz tkyaqil Txʼotxʼ toj donate.pr418.com ex toj junjuntl tten.