Aidrubanka kau tara lilkika nani ba wan kupia nikbisa, bara Baibil smalkanka nani tânka briaia hilp wan munisa. Mani 2020 Aidrubanka Kau Tara “¡Piua bani lilia bas!” dukiara lilka nani 114 paskan. Tâ Bri Daknika bara ai hilp mamunrika nani aisanka 43 sin baha nani tilara sa. ¿Baha lilkika nani paskaia dukiara nahki karna wark takan? bara ¿lalah an nit kan?

 Tasba aiska ra muihni lakri nani 900 baku naha warkka tara tâ baikaia dukiara ai taimka sakan bara ai karnika sin yus munan. Sut kulkbia kaka, mani wâl bilkara 100.000 awar kau pura wark taki banhwan. Baibil pulanka soka “Nehemías: La felicidad que viene de Jehová es nuestra fortaleza” paskaia dukiara 70.000 awar nit kan. Naha soka ba 76 minit brisa.

 Baha baman apia sa. Mana luha wark taki muihni lakri nani ra tâ baikaia, bara lilka paskaia dukiara dîa nit ba ridi munaia dukiara lalah ailal nit kan.

 Audio bara Video Apiska ra wark taki Jared Gossman ba naku aisisa: “Tâ Bri Daknika ra Smalkaia Daknika ba lilka nani ra kuntri sât sât takbia want sa. Naha asla takanka ra muihni lakri nani ba tasba aiska ra bâra ba kaikbia dukiara. Baha mita naha warkka tara tâ baikan sa kuntri 11 wina 24 daknika nani ba. Lalah ailal nit kan, bara kainara pain laki kaiki asla wark takaia nit kan”.

 Wan lilkika ailal dukiara masin stail sât sât paski ba yus munaia nit taki kan. Tila win kum, “Nehemías: La felicidad que viene de Jehová es nuestra fortaleza” Baibil pulanka lilka alkaia dukiara Patterson (Nueva York) lamara Mount Ebo tawanka ra lilka alkaia pliska kum paskan. Lalah ba tnatka kau pain ra yus muni, ¿Nihimaya piua ra nahki kan ba kat paskaia dukiara dîa daukan lukisma? Muihni lakri nani ba Jerusalem kutbanka paskaia dukiara, dukia ingni nani yus munan. Tat nani yarika 6 mita nani (20 pies) bri ba diara kum wal pura praki pint dingkan. Kaikan taim walpa baku takan. Baha kutbanka nani ba wirha apia kan. Plis kum wina plis wala ra lakaia isi kan ba mita aima ailal tnatka sât sât ra yus munaia sip kan. Baha ba lalah kau wiria yus munaia hilp munan. Baku kan kra sin, baha nani paskaia dukiara 100.000 dalas baku nit kan. a

 Nahki wark taki banhwan ba nu taki, aidrubanka kau tara programka dukiara nanara yawan kau tingki lukisa. Tasba aiska ra muihni lakri nani ba want kabia Jehova ra kau mayunaia. Internet donate.pr418.com bara tnatka wala nani bâk man nani wilinkira ni prisant yabisma ba ra yawan tingki lukisa.