Amavidyo yano tukatamba pa kulongana kwa citungu yakatufika sana pa mwezo swinya yakatwavwa nu kwivwicisya vino Baibolo ikasambilizya. Pa kulongana kwa citungu ukwa mu 2020 kuno kukuti ‘Muwasecelela Lyonsinye’! pali amavidyo 114. Co-o cikusanzyako na malyasi 43 yano yalandwanga nawa mwi Wumba Lino Likatungulula na wakavwa wawo. Uzye mukatela amwelenganyapo incito yino yikawapo ni ndalama zino zikasumbwa pa kupanga ya-a amavidyo?

 Mupipi na wanawitu na wankazi 900 ukuzinguluka insi yonsinye, wawomvizye impindi yawo na vino wacenjelamo pa kupanga amavidyo. Wasumvile ama awazi mupipi ne 100,000 pa myaka yiwili pa kuti wo-o umulimo wusile. Mwe wo-o umulimo mwasanzizyemo na maawazi 70,000 yano yalondekwanga pa kumala icilanjililo ca mu Baibolo ica mamineti 76 ica mutwe wa kuti Nehemiya: “Ukusecelela mwe Yehova Ayali Amaka Yinu.”

 Kweni pakasumba impiya imvule pa kusakamala wa-a awawomvi wakuyikundila na pa kuwapa iviwombelo na vyonsinye vino vikulondekwa pa kuti wo-o umulimo wusile.

 Umwanawitu e Jared Gossman wino akawombela mu Dipatimenti ya Audio/ Video Sevices, watili: “E Komiti ya Kusambilizya iyi Wumba Lino Likatungulula yikalonda mu mavidyo mwawa intambi ni vifulo ivipusane pusane. Pa mulandu wa kuti twawa pa wanawitu na wankazi awa munsi yonsinye, fwe vyonsinye vyo-o vifwile ukuloleka. Pa kuti co-o cicitike, twawa na matimu 24 munsi 11, wano wakawombela ponga pe wo-o umulimo. Pa kuwomba wo-o umulimo pakapinda impiya imvule, ukupekanizizya lyankani, nu kutantika icete ivintu pa kuti awantu ukuzinguluka insi yonsinye wize wawombela icete ponga.”

 Pa kuti tupange amavidyo amavule, tukalondekwa iviwombelo iviyiwele. Ku cakulolako, pakupanga e vidyo ya kuti Nehemiya: “Ukusecelela mwe Yehova Ayali Amaka Yinu” wawisileko vimwi pe studyo yino wakati Mt. Ebo yino yawela mupipi ne Patterson, ku New York, mu U.S.A. Pa kuwomvya icete imisangulo, na pa kuti vino vili mwe vidyo vyalanjizya vino calinji ku nsizi mu mpindi zya mu Baibolo, awanawitu wazenzile tumwi tuno twakozile iviwumba vya musumba uwukali uwa Yerusalemu. Cila luwumba lwawanga na vimwi ivitontecele ivya mamita 6 vino wapentanga aviwaloleka ngati aliwe. Vyo-o “iviwumba” vyakupanga wavizengululanga pa kuti vilingane na cino cikulandwapo, co-o calenzile watakala ivivule. Nanti aca kuti indalama ukufika kwe K1, 853, 502.60 (amadolar ya ku U.S. $100,000) azyo zyalondekwanga pa kuzenga vino vyalondekwanga pa cilanjililo citupu. a

 Ukumanya vyonsinye kulenzile twasalifya nkaninye pa kulongana kwa citungu ukwe wo-o umwaka. Amuno twamanyako tumwi pe vino calinji pakupanga amaprogramu yano tukutamba. Tusakuvwilika ukuti yonsinye imilimo yino yapisile pe yo-o programu yililenga awantu insi yonsinye ukulumbanya Yehova. Tukumisalifya nkaninye pa misangulo ya munsi yonsinye yino mukasangula ukuwomvya donate.pr418.com ni nzila zinji.