Videos tlen tikitaj ipan uejueyi tlanechikolistli tlen eyi tonali asi ipan toyolo uan techpaleuia nojua tijkuamachilisej Biblia. Ipan ueyi tlanechikolistli tlen eyi tonali 2020 “¡Nochipa xiyolpaktokaj!” tikitakej 114 videos, uan 43 tlen nopa videos kipanoltijkej toikniuaj Katli kinyakanaj Jehová itlajtoltemakauaj uan katli kinpaleuiaj. ¿Inkimatij keski tekitl mochiua uan keski tomij motekiuia kema mochiua ni videos?

 Nechka 900 toikniuaj tlen nochi Tlaltipaktli kitekiuijkej inintonal uan tlen kimatij kichiuaj, kiampa kikualtlalijkej tlen mopanoltiskia ipan ni ueyi tlanechikolistli. Ipan nopa ome xiuitl tlen uejkajki ni tekitl, kitekiuijkej nechka 100,000 horas. Uan tlen nopa horas se 70,000 horas kitekiuijkej kema kichijchijkej nopa película katli uejkaua 76 minutos katli itoka Nehemías: ¡Nopa pakilistli tlen techmaka Jehová, techmaka chikaualistli!

 Kej inkimatij, monejki miak tomij uan kiampa mokojki tlen motekiuik, tlen mochijchijki, kampa titekitiskiaj uan tlen ika tikinmokuitlauiskiaj katli techpaleuijkej.

 Jared Gossman, katli tekiti kampa kichiuaj grabaciones, kiijtoua: “Katli kiitaj kenijkatsa techmachtisej kinekij ma nesi ipan videos toikniuaj tlen kampa ueli euaj uan tlen nopaya momajtokej kichiuaj. Nopa techpaleuia nojua tlauel ma timoiknelikaj. Yeka, uelki kichiuaj ni tekitl pampa 24 equipos tlen toikniuaj tlen 11 altepemej sansejko tekitikej. Monejki kitekiuisej miak tomij, kuali moiljuisej tlen kichiuasej uan nochi mosentikapaleuisej”.

 Ipan miak videos, monejki tlamantli tlen kuali kichijchijtokej uan tlamantli katli kichiua kuali ma nesi. Se neskayotl, kema kichijchijkej nopa película tlen Nehemías: ¡Nopa pakilistli tlen techmaka Jehová, techmaka chikaualistli!, monejki kikualtlalisej uan kichijchiuasej nochi tlen neski ipan nopa película kalijtik kampa kichiua grabaciones ipan Mount Ebo, nechka Patterson (Nueva York). Toikniuaj kinejkej kuali kitekiuisej tomij uan ma nesi kej nelnelia panok, yeka kichijchijkej nopa altepetl tlen Jerusalén ika tlamantli tlen amo etik. Sejse tlen ni tlamantli kipiayaya chikuasej metros iuejkapanka, ni eliyaya uapali uan ipani kitlalilijtoyaj se tlamantli tlen amo etik uan nesiyaya kej tetl. Tlen kitekiuijkej ueliyayaj kiuikaj sejkanok uan kiampa kichijchiuayayaj sekinok tlamantli, kiampa amo monejki kikouasej miak uapali. Maske kiampa kichijkej, ipan nochi tlen mokojki motekiuik nechka 100,000 dólares. a

 Tijmatisej ni tlamantli kichiua nojua tijpatiitasej nopa ueyi tlanechikolistli tlen ni xiuitl. Timotemachiaj nochi tlen tijchiuaj kiueyichiuas Jehová ipan nochi Tlaltipaktli. Tiinmechtlaskamatiliaj pampa intemakaj tomij ika nochi inmoyolo ipan donate.pr418.com uan ipan sekinok tlamantli.