Videos tlen tikimitaj ipan Ueyi Tlanechikojli yeyi Tonajli, ajsij ipan toyojlo niman techpaleuiyaj kuajli matikasikamatikan Biblia. Ipan ueyi tlanechikojli 2020 “¡Nochipa xpakikan!” onoitakej 114 videos, niman itech yejon videos, 43 katkaj intlamachtiluan tokniuan itech Grupo akin Tlayekana niman akin kinpaleuiyaj. ¿Yotimotlajtoltijka kenon nochijchiuaj yejuin videos niman kech tomintsin nopopoloua?

 Kanaj 900 tokniuan ipan nochi tlaltikpaktli okitekitiltijkej intiempo niman tlen ueli kichiuaj niman ijkon okichijchiujkej programa itech yejuin ueyi tlanechikojli. Ipan yejon ome xiuitl tlen ouejkauj yejuin tekitl, okitekitiltijkej kanaj 100,000 horas. Itech yejuin horas, 70,000 onotekitilti para nochijchiuas se película tlen ouejkauj 76 minutos tlen itoka Inemilis Nehemías: “Pakilistli tlen techmaka Jehová yejon tlen texchikaua”.

 Ononek miyek tomintsin niman ijkon kuajli tikintlajpiyaskej akin otekitkej, tiktlaliskej kampa tekitiskej niman tikpiyaskej tlen ika tekitiskej.

 Jared Gossman, akin tekiti ipan Servicios de Audio y Video, kijtoua: “Grupo akin kiyekana Tlamachtijli kineki ika ipan videos mauajnesikan miyekej tokniuan akin oksekan chantij. Ijkon ueli tikimixmatij miyekej tokniuan. Yejuin tekitl ouel onochiuj pampa 24 equipos itech tokniuan akin chantij ipan 11 países san sekan otekitkej niman kuajli onoyektlalijkej. Noijki ononek notekitiltis miyek tomin”.

 Ipan miyek videos ononek tikinkuiskej seki equipos niman ononek kuajli titlayektlaliskej. Película Inemilis Nehemías: “Pakilistli tlen techmaka Jehová yejon tlen texchikaua”, onochijchiuj ipan estudio de Mount Ebo, nisiuj Patterson (Nueva York). Donaciones kuajli onotekitiltijkej pampa tokniuan xmiyek tomin okipopolojkej ijkuak okinchijchiujkej itepanuan Jerusalén. Cada tepantli kipiaya 6 metros ika uejkapan, niman okichijchiujkej ika madera niman okitlalilijkej okse material tlen xyetik, tlen nesiya ken tetl. Yejuin tepantin ueliyaj nejkuaniayaj niman ijkon ueliya nochijchiuayaj okseki escenarios, ijkon, xononek nochijchiuaskej miyek tepantin. Maski ijkon, onopopolo 100,000 dólares. a

 Tikmatiskej yejuin kichiua más matiktlasojkaitakan ueyi tlanechikojli ipan yejuin xiuitl. Tikmatstokej ika nochi yejuin kichiuas manoueyichiua Jehová ipan nochi tlaltikpaktli. Timechtlasojkamachiliaj ipampa nemodonaciones tlen nenkitemakaj ipan donate.pr418.com.