Onovidiu mbotyonge mbetuhika unene komutima tupu mbetukuatesako okunoñgonoka vali nawa Ombimbiliya. Otyonge otyo 2020 tyati: “Hambukwei Apeho!” muna onovidiu 114 nomalongomona 43 alingwa nononkhalamutwe mbo Nombangi novakuatesiko vavo. Utyivila okusoka ononkhono tyesukisile opo tulinge onovidiu ombo no nombongo mbanyingila-po?

Ovakuatate nonomphange vehungi 900 ouye auho vaavele omuwo wavo nounongo wavo opo vakuatesako okulinga otyonge otyo. Okuhonyeka omuwo valinga, tyilamba po noola 100.000 ovilinga ñgeno ankho vilingwa momanima evali. Omo muakutikiya onoola 70.000 mbesukile opo tulinge ondalama yapolwa Mombimbiliya yo nominutu 76 ina osapi yati: Neemiya: “Ehambu Litunda ku Siovaa Olio Malimupameka.”

Ngetyi hamwe upondola okusoka, tyesukisile onombongo ononyingi okukuatesako ovanthu opo valinge ovilinga okutunga apa ovanthu vesukisa okulinga novityuma vesukisile okulandwa opo tutyivile okuvitula ovilinga ovio.

Omukuatate Jared Gossman uundapa moseketa yokulinga onovidiu wati: “Okomisau Yokulongesa yo Nonkhalamutwe mbo Nombangi mba Siovaa tyina ilinga onovidiu ihanda okulinga novanthu vovilongo vielikalaila no ponomphangu mbelikalaila. Otyo tyikuatesako ovanthu aveho okutala okuti ovakuatate vetu vekahi mouye auho. Opo tutyivile okulinga otyilinga otyo tuesukisile okuundapa novikundyi 24 vekahi movilongo 11. Opo tulinge otyilinga otyo tyesukisile onombongo ononyingi pala okuonganeka, nokuhongolela ovilinga ovio.”

Tupu onovidiu mbetu ononyingi opo tutyivile okumbulinga tuesukisile oviti vielikalela vilinga onombongo ononyingi. Mongeleka, pokulinga ovidiu Neemiya: “Ehambu Litunda ku Siovaa Olio Malimupameka” tuatulinge omphangu yokulinga onovidiu Momphunda Ebo popepi no Patterson, ko Nova York, U.S.A. Opo tuundapese nawa onombongo ankho tuna, tuatungile nawa omphangu ina opo ovidiu ilikuate netyi tyikahi nokulekeswa mondalama okulinga omalusi, nokutunga ovimato ngatyina o Selusalei yo kohale. Ovimato viatyo viatungwa nomavai noviti epandu vielikalaila pokumanuhula atumate-mo omamanya tyina weetala uti viatungwa nomamanya. “Ovimato” ovio vipondola okupolwa-po avikatungwa komphangu onkhuavo, okulinga tyatepulula koviti ankho matusukisa opo tulinge onovidiu. No ngotyo vala panyingilile onondolale 100.000 (U.S.) opo tutyivile okutunga omphangu palingilwa ondalama. *

Okunoñgonoka otyo atyiho tyitukuatesako vali okupandula otyonge tyetu tyenima lino. Tuna onthumbi yokuti ononkhono mbalaka-po opo tulinge otyonge tyakuatesako ouye auho okuhilivika Siovaa. Tupandula unene oviawa vienyi mukahi nokulinga ouye auho mo donate donate.pr418.com nomonkhalelo ononkhuavo.