Nasasabi na saray video ed regional a kombension so puso tayo tan makakatulong iratan pian mas natalosan tayo iray ibabangat na Biblia. Diad 2020 ‘Manliket Kan Naynay’! ya regional a kombension, walay 114 ya video, kaiba lad satan so 43 ya paliwawa na saray membro na Mananguley ya Ulop tan saray katulongan da. Kasin naisip mo la so kabaleg na impansagpot tan ginastos pian napawala irayan video?

 Ngalngali 900 ya agagi tayo ed nanduruman bansa so angusar ed panaon tan abilidad da pian napawala so programa. Ami-amin et ngalngali 100,000 ya oras so inusar parad satan diad loob na duay taon. Kaiba lad satan so 70,000 ya oras ya inusar pian nasumpal so 76-minuto ya drama ya nibase ed Biblia ya say title to et Nehemias: “Say Liket ya Iiter nen Jehova so Biskeg Yo.”

 Siempre, baleg ya kuarta so kaukolan pian naasikaso irayan masakripisyon agagi ya namboluntaryo, tan napawala iray kaukolan da pian nasumpal so proyekto, singa say technical support, saray equipment tan pasilidad.

 “Labalabay na Teaching Committee na Mananguley ya Ulop ya i-feature ed saray video tayo iray nanduruman kultura tan bansa. Say rason et walad nanduruman pasen na interon mundo iray agagi tayo tan labay tayon napatnagan itan ed saray video tayo,” so imbaga nen Jared Gossman ya mantratrabaho ed Audio/Video Services. “Pian nagawaan itan, 24 ya grupo diad 11 ya nanduruman bansa so saniiban nankimey ed sayan proyekto. Lapud sayan kabaleg na kimey, kaukolan so dakel ya kuarta, pamplanon maong, tan kooperasyon na saray agagi ya mantutulongan ya mankikimey diad interon mundo.”

 Diad dakel ya video tayo kaukolan iray impasadya ya kagawaan tan saray set. Singa bilang, saray set parad Nehemias: “Say Liket ya Iiter nen Jehova so Biskeg Yo” et ginawa diad loob na studio ed Mt. Ebo ya asingger ed Patterson, New York, U.S.A. Pian nausar ed sankaabigan iray donasyon na agagi tan naseguro ya susto base ed history so itsura na drama, angipaalagey iray agagi na anlemew iran set ya say desinyo to et mipara ed saray padir na Jerusalem nensaman. Say kaatagey na saratan et 20 feet ya gawad kiew ya apaliberan na foam tan pinintoran pian say itsura to et singa bato. Sarayan “padir” et nayarin iyalis-alis depende ed eksena, kanian agla kaukolan so dakdakel ya set. Anggaman ontan, ngalngali $100,000 (U.S.) so agastos diad impanggawa ed saray set parad sayan drama labat. a

 Lapud saratan ya detalye, mas lalo tayon naapresya so programa na regional kombension ed sayan taon. Matalek tayo ya saray sagpot ed impamawala ed sayan programa et mangiter na dayew ed si Jehova diad interon mundo. Salamat ed saray impapuson donasyon parad sankamundoan ya kimey panamegley na donate.pr418.com tan ed arum nin paraan.